नगर  ः ‘कोरोना’चा प्रादुर्भाव वरचेवर वाढत गेला आणि शहरातून येत असलेल्या पाहुण्यांमुळे गावखेड्यात धडकी भरली असल्याचे सध्या राज्यभर चित्र पहायला मिळत आहे. नगरसह राज्यातील अनेक भागांत शहरातून विशेषतः मुंबईतून आलेले पाहुणे कोरोन बाधीत असल्याचे पहायला मिळत असून त्यामुळे ग्रामीण भागात ‘कोरोना’चा शिरकाव झाला आहे. ‘कोरोना’च्या भितीने गावखेडे हतबल झाले आहेत.

मुंबई, पुणे, औरंगाबाद, नाशिक, सोलापूर, कोल्हापूर, नागपूर आदी मोठ्या शहरात ‘कोरोना’चा प्रादुर्भाव वाढतच आहे. नोकरी- व्यवसायानिमित्त अनेक जण त्या शहरांत स्थायिक झाले. मात्र, ‘कोरोना’च्या धास्तीने आता ते गावाकडे परतत आहेत. त्यातील काही मंडळी तपासणी करून व गावात आल्यानंतर विलगीकरण कक्षात थांबत आहेत. मात्र, काही जण रात्री-अपरात्री चोरवाटांनी गावात येऊन थेट घरी पोचत आहेत. त्यामुळे सर्वच ग्रामस्थांचा जीव टांगणीला लागला आहे. ही मंडळी रात्री-अपरात्री येतात कशी? त्यांना कोण आणून सोडते? जिल्ह्याच्या सरहद्दीवर बंदोबस्तासाठी असलेले पोलिस व कर्मचारी करतात काय, असे एक ना अनेक प्रश्‍न यातून उपस्थित होत आहेत.

जिल्ह्यात गेल्या आठ दिवसांपासून बाहेरून आलेले नागरिकच ‘कोरोना’बाधित आढळून येत असल्याचे स्पष्ट झाले आहे. त्यामुळे पाहुण्यांना गावाबाहेरच ठेवा, नाही तर त्यांना शहरातच थांबवा, अशी मागणी होत आहे.   जावई माझा भला, पण.... रोजगार, नोकरीच्या निमित्ताने खेडयातील लोक शहरात स्थायिक झाले. काळाच्या ओघात गावांकडे दुर्लक्ष झाले, अनेकांनी गावाकडची शेती, घरदार विकले आणि शहरात स्थायिक झाले. आता कोरोनाचा शहरात प्रादुर्भाव वाढल्याने अनेक कित्येक वर्ष गावाकडे फिरकले नसलेलेही गावांत येत आहे. त्यात ज्यांनी गावांकडे रहायला सुविधा नाही त्यांनी सासरवाडी जवळ केली आहे. नगरसह मराठवाड्यातील अनेक ठिकाणी हेच चित्र आहे. नगर जिल्ह्यात आतापर्यंत चार जावई कोरोनाबाधित निघाले. बीडमध्येही असाच प्रकार उघड झाला. जावई माझा असं म्हणणाऱ्या सासरवाडीची आता सहनही होईना अन् सागंताही येईना अशी अवस्था झाली आहे.