अकोला ः कोरोना विषाणूचा प्रादुर्भाव रोखण्यासाठी संचारबंदी लागू केल्याने काही दिवसांपासून शेतकऱ्यांची मोठी कोंडी झाली आहे. प्रामुख्याने शेतातील माल बाजारपेठेपर्यंत पोचविण्यात अडचणी आल्याने अनेक शेतकऱ्यांचे नुकसान झाले. मात्र, आता ही परिस्थिती सावरण्यासाठी कृषी यंत्रणांनी पुढाकार घेतला आहे. अकोला जिल्ह्यात शेतीमाल ग्राहकांपर्यंत पोचविण्यासाठी प्रयत्न सुरु झाले असून दीड हजारांवर शेतकऱ्यांनी शेतीमाल पुरवठ्यासाठी कृषी विभागाकडे नोंदणी केली आहे. यामुळे लवकरच शेतकरी ते ग्राहक अशी साखळी उभी राहिल, अशी अपेक्षा व्यक्त होत आहे.

‘कोरोना’चा प्रादुर्भाव वाढू नये यासाठी लॉकडाऊन केल्याने बाजारपेठांमधील व्यवहार ठप्प झाले होते. परंतु जीवनावश्यक वस्तुंची गरज लक्षात घेता या वस्तुंना संचारबंदीतून वगळण्यात आले. मात्र, असे असले तरी आदेश असूनही पोलिस प्रशासनाकडून सुरुवातीला अडवणूक झाली. परंतु वेळोवेळी शासनाकडून आदेश निघाल्याने आता ही साखळी सुरळीत होण्याची शक्यता आहे.

कृषी विभागाने जिल्ह्यातील प्रत्येक तालुक्यातील भाजीपाला, फलोत्पादकांची नोंदणी सुरु केली आहे. आतापर्यंत दीड हजारांवर शेतकऱ्यांनी आपल्याकडील उपलब्ध मालाची माहिती नोंदविली आहे. 

शेतकऱ्यांनी त्यांच्याकडे कोणता भाजीपाला किती किलो आहे, फळे किती आहेत याबाबत माहिती देऊन जवळच्या बाजारपेठेबाबतही अपेक्षा व्यक्त केली. ही सर्व माहिती जमा करण्यात आली आहे. भाजीपाला, फळे थेट ग्राहकापर्यंत पोचविण्यासाठी महापालिका आयुक्त, नगरपालिकांचे अधिकारी यांच्या सहकार्याने विक्रीची ठिकाणे निश्चित करण्यात आली आहेत. या ठिकाणी सोशल डिस्टसिंग ठेवत व खबरदारी घेत भाजीपाला, फळे विक्री करण्याचे सक्त निर्देश देण्यात आले.