सांगली  : जिल्ह्यातील दुष्काळग्रस्त भागाला वरदान ठरणाऱ्या ड्रॅगन फ्रुट या फळाच्या लागवडीखाली दोन वर्षांपूर्वी ४० एकर क्षेत्र होते. दोन वर्षांत ड्रॅगन फ्रुटची लागवड १०० एकर क्षेत्रावर झाली आहे. यात सर्वाधिक लागवड क्षेत्र जत तालुक्यात आहे, अशी माहिती कृषी विभागाच्या सूत्रांनी दिली.

निसर्गाचा लहरीपणा आणि सततच्या दुष्काळामुळे डाळिंब, द्राक्ष बागायतदारांना नेहमीच आर्थिक संकटांचा सामना करावा लागला आहे. तेलकट डाग रोगामुळे डाळिंब बागा संकटात सापडत आहेत. या पार्श्वभूमीवर जिल्ह्यातील दुष्काळग्रस्त पट्ट्यातील जत तालुक्यात प्रामुख्याने ड्रॅगन फ्रुट लागवडीस प्रारंभ झाला. त्यानंतर अनेक शेतकऱ्यांनी या पिकाचा अभ्यास करून लागवड करण्यास पुढाकार घेतला आहे.

जत तालुक्यात सुमारे ५० एकरांवर ड्रॅगन फ्रुटची लागवड आहे. तसेच तासगाव, मिरज या पट्ट्यातदेखील या फळाची लागवड वाढू लागली आहे. जिल्ह्यात गेल्या दोन वर्षांपूर्वी ४० एकरांवर ड्रॅगन फ्रुटची लागवड होती. त्यातून सुमारे ७० टन फळांची विक्री सांगली शहरासह अन्य भागात केली गेली. कमी पाण्यात आणि कमी खर्चामुळे शेतकरी या पिकाकडे वळू लागले आहेत. कृषी विभागदेखील शेतकऱ्यांना ड्रॅगन फ्रुट लागवडीबाबत मार्गदर्शन करीत आहे. सध्या जिल्ह्यातील ९० शेतकऱ्यांनी १०० एकरांवर ड्रॅगन फ्रुटची लागवड केली आहे.