अकोला  ः यंदाच्या हंगामात मृग नक्षत्रात पावसाने हजेरी देत चांगली सुरुवात केली खरी, मात्र नंतरच्या काळात जिल्ह्यात अनियमित पाऊस झाल्याने जून महिन्यात सरासरीइतक्या पावसाची नोंद झालेली नाही. जिल्ह्यात जूनमध्ये ९२.४ टक्के पाऊस झाला आहे. या पावसाचा हंगामातील पीक लागवडीवर मोठा परिणाम झालेला आहे. 

या हंगामाची सुरुवात जोरदार झाल्याने जूनमध्ये समाधानकारक पावसाची अपेक्षा व्यक्त केली जात होती. यंदा मृगातच पाऊस सुरू झाल्याने पेरण्यांना प्रारंभ झाला होता. नंतरच्या काळात जिल्ह्यात पावसात खंड पडला. १०० मिलिमीटर पाऊस झाल्यानंतरच पेरणीला सुरुवात करावी असे तज्ज्ञांकडून वारंवार आवाहन करण्यात आले तरी शेतकऱ्यांनी पावसाचा अंदाज घेत पेरणी केली. यामुळे काहींची पेरणी साधली. बऱ्याच शेतकऱ्यांचे प्रामुख्याने सोयाबीन बियाणे मात्र उगवले नाही. यामुळे बियाणे कंपन्यांविरुद्धच्या तक्रारी वाढल्या आहेत. 

पहिल्याच महिन्यात समाधानकारक पाऊस न झाल्याचा फटका लागवडीला बसलेला आहे. पावसातील ही तूट प्रामुख्याने मूर्तिजापूर तालुक्यात अधिक आहे. येथे सरासरीच्या केवळ ६८ टक्केच पाऊस पडलेला आहे. याशिवाय अकोट येथे ९६.३, बाळापूर येथे ९१.६, बार्शीटाकळीत ८४.५, अकोल्यात ९३.१ मिमी असा पाऊस नोंद झाला आहे. शिवाय जिल्ह्यात जूनमधील सरासरी इतका पाऊस झालेला नाही. जून महिना उलटला तरी दिवसाच्या तापमानात घट झालेली नाही, त्यामुळे शेतकऱ्यांना पावसाची प्रतीक्षा कायम आहे.