औरंगाबाद : दूध उत्पादन खर्चाच्या तुलनेत परवडणारा दूध दर उत्पादकांना मिळावा, या मागणीसाठी शनिवारी (ता.१) मराठवाड्यात दूध उत्पादकांनी आंदोलन केले. त्याचा थेट परिणाम  दूध संकलनावर झाला आहे.

औरंगाबाद जिल्ह्यातील नगर जिल्ह्याच्या सीमेवर असलेल्या डोनगाव शिवारातील गोदावरी नदीकाठच्या मंदिरातील श्री गणपती मूर्तीला दुग्धभिषेक व त्याच मंदिराबाहेर राज्यातील सत्ताधारी पक्षाची नावे असलेल्या दगडाची प्रतीकात्मक देव म्हणून त्यांना दुग्धभिषेक घालून पूजा करत योग्य निर्णय घेण्याचे साकडे घालण्यात आले. यावेळी शेतकरी नेते धनंजय धोर्डे यांच्यासह दूध उत्पादक यावेळी उपस्थित होते.

दरम्यान, शुक्रवारी(ता. ३१) सायंकाळी लाखगंगा येथील सरपंच दिगंबर तुरकणे, राजेंद्र तुरकणे, सोपान पडवळ, नाना बाप्पू तुरकणे, केशव मोरे, त्र्यंबक तुरकणे यांच्यासह जवळपास शंभरावर दूध उत्पादकांनी लाखगंगा (ता. वैजापूर) येथील ग्रामदेवतेला दुग्धभिषेक करून जोरदार घोषणाबाजी करीत दूध दरप्रश्नी आपल्या एकजुटीचे दर्शन घडविले होते. यावेळी लाखगंगा येथील भजनी मंडळाच्या सदस्यांनी भजन गाऊन श्री हनुमंताला दूध उत्पादकांच्या मागण्यांविषयी सरकारला सबुद्धी देण्याचे साकडेही घातले होते.

दूध उत्पादकांच्या मागण्यांसाठी किसान सभा, दूध उत्पादक शेतकरी संघर्ष समिती व समविचारी संघटनांच्या वतीने २० जुलैपासून राज्यात आंदोलन सुरू आहे. १ ऑगस्टला राज्यभर गावोगावी चावडीवर दुधाचा अभिषेक करीत व निदर्शने करीत हे आंदोलन तीव्र केले जाणार होते. त्यानुसार मराठवाड्यात विविध ठिकाणी शनिवारी(ता.१) आंदोलने झाली.

दूध संकलनावर परिणाम शासन निर्णय घेत नाही तोवर डेअरींना दूध घालायचे नाही, या दूध उत्पादकांच्या भूमिकेमुळे शनिवारी दूध संकलनावर मोठा परिणाम झाला. बीड जिल्ह्यातील आष्टी तालुक्यातील दूध संकलन ठप्प होते. उस्मानाबाद जिल्ह्यातील तीन खासगी प्रकल्प व परभणी जिल्ह्यातील दोन प्रकल्पांचे दूध संकलनही बंद होते. जवळपास दीड लाख लिटर दूध संकलन शनिवारी दुपारपर्यंत झाले नसल्याची माहिती सूत्रांनी दिली.  

भाजपचे एल्गार आंदोलन औरंगाबाद येथील दूध डेअरी चौकात भाजपने आमदार अतुल सावे यांच्या नेतृत्वात एल्गार आंदोलन केले गेले. यावेळी राष्ट्रवादीचे अध्यक्ष शरद पवार यांच्या प्रतिमेस दुग्धाभिषेक करण्यात आला. सिल्लोड शहरातील डॉ. बाबासाहेब आंबेडकर चौक,  भगुर फाटा (ता.वैजापूर) येथे रास्ता रोको, देवगाव (ता.पैठण), उजनी (ता.औसा) येथे लातूर - सोलापूर  महामार्गावर भाजपच्या वतीने दूध दरवाढीसाठी रास्ता रोको, बोरदहेगाव फाटा येथे नागरिकांना दूध वाटप, बिडकीन येथे निदर्शने, चित्तेपिपंळगाव येथे दूध न स्वीकारता दूध बंद आंदोलन केले गेले. जालना जिल्ह्यातील अंबड येथेही एल्गार आंदोलन केले गेले.

प्रतिक्रिया गायीच्या दुधाला असलेला ३० रुपयांचा दर सरकारने १५ रुपयांवर आणून ठेवला. आता जोपर्यंत शासन योग्य निर्णय घेत नाही, तोपर्यंत डेअरीला दूध घालणे बंद ठेवणार आहे. - जालिंदर तुरकने, दूध उत्पादक, लाखगंगा, जि. औरंगाबाद.   सत्तेतील तिन्ही पक्षांना देव मानत दुधाचा अभिषेक करून सुबुद्धीने निर्णय घेण्याची विनंती केली आहे. सरकारने दूध उत्पादकांचा अंत पाहू नये. - धनंजय धोर्डे, शेतकरी नेते, डोनगाव, जि. औरंगाबाद.   या आहेत प्रमुख मागण्या