शेगाव जि. बुलडाणा ः श्री संत गजानन महाराज संस्थानच्या पालखीचे पायदळ दिंडीसह मंगळवारी (ता. १९) सकाळी शेगाव येथून विठ्ठलनामाचा जयघोष करीत श्री क्षेत्र पंढरपूरकडे प्रस्थान झाले. गेली ५० वर्षे ही पालखी आषाढीच्या सोहळ्यात सहभागी होत आली आहे. श्री संत गजानन महाराजांचा जयजयकार करीत टाळ मृदंगाच्या गजरात, अश्व, गज, रथ, मेना, भालदार, चोपदार, अशा राजवैभवी थाटात या पायदळ वारीत टाळकरी, पताकाधारी वारकरी सहभागी झाले आहेत. पालखी श्रींच्या प्रकटस्थळी आल्यानंतर तेथे आरती करण्यात आली. टाळ मृदंगाचा निनाद, पावल्या खेळताना टाळकऱ्यांच्या ‘गण गण गणात बोते'च्या गजराने शहरात मंगलमय वातावरण पसरले होते. सकाळी मंदिरात सुशोभित राजसिंहासनावर श्रींचा रजत मुखवटा ब्रह्मवृंदाच्या मंत्रोच्चारात विराजमान झाल्यानंतर संस्थानचे व्यवस्थापकीय विश्‍वस्त कर्मयोगी शिवशंकरभाऊ पाटील यांच्या हस्ते पूजा करण्यात आली. त्यानंतर संस्थानचे कार्यकारी विश्‍वस्त निळकंठदादा पाटील यांनी पजूा केली. तसेच या वेळी संस्थांनचे इतर पदाधिकारी उपस्थित होते. स्वागत सोहळा श्रींचे प्रगटस्थळ येथे झाला. श्रींच्या पालखी समवेत वारकऱ्यांना फराळ व नागझरी रोडलगत अशोकराव देशमुख यांच्या वतीने चहापान देण्यात आले. संत नगरीतून निघालेल्या पालखीचे पहिले स्वागत श्री क्षेत्र नागझरी येथे श्री गोमाजी महाराज संस्थानच्या वतीने झाले. या वेळी संस्थानतर्फे वारकऱ्यांना महाप्रसाद देण्यात आला.