मानोरा जि. वाशीम ः तालुक्यातील  कारखेडा येथील प्रयोगशील महिला शेतकरी गीताबाई राठोड यांच्या बोराच्या बागेत माकडांनी मोठ्या प्रमाणात उच्छाद घालून नुकसान केले. तोडणीला आलेले बोर यामुळे खराब झाले.   निसर्गाच्या लहरीपणावर मात करण्यासाठी शेतकरी विविध प्रयोग करीत आहेत. या भागात संत्रा, लिंबू, पेरू, सीताफळ, बोर बागा वाढू लागल्या, असे असताना शेतकऱ्यांना बदलत्या वातावरणामुळे कधी अवकाळी पावसाचा तर कधी अवर्षणाचा सामना करावा लागतो. कारखेडा येथील महिला शेतकरी गीता राठोड यांनी आपल्या एक एकरात ॲपल बोराची लागवड केलेली आहे. बोरांच्या या चारशे झाडांपैकी बोरांनी लगडलेल्या आणि तोडणीस आलेल्या जवळपास शंभर झाडांची दोन दिवस आधी माकडांनी मोडतोड केल्याचा प्रकार घडला. यामुळे महिला शेतकऱ्यांचे मोठे आर्थिक नुकसान झाले आहे. वनविभागाने झालेल्या नुकसानीची दखल घेण्याची मागणी या महिलेने केली आहे.