अकोला  ः सोयाबीनचा हंगाम लवकरच सुरू होत आहे. पावसाने मोठा खंड दिल्याने त्याचा परिणाम या वेळी उत्पादनावर होण्याची शक्यता अाहे. असे असतानाच सोयाबीन काढणी, मळणी, वाहतूक अशा सर्वच खर्चात यावर्षी वाढ झाल्याने शेतकऱ्यांना याचा अर्थिक ताण सहन करावा लागणार अाहे.

या हंगामात लागवड झालेले सोयाबीन बहुतांश ठिकाणी काढणीला अाले अाहे. शेतकरी मजुरांची जुळवाजुळव करीत अाहे. या हंगामात सोयाबीन सोंगणीचा दर एकरी दोन हजार ते २२०० रुपये करण्यात अाली अाहे. सोंगणी व सुडी लावून देण्याचे काम एवढ्या पैशात मजूर करून देतील. यानंतर सोयाबीन मळणी ही या हंगामात १५० रुपये पोत्यापर्यंत करण्यात अाली. डिझेलचे दर वाढल्याने मळणीचा दर पोत्याला २० ते ५० रुपयांपर्यंत वाढविण्यात अाला अाहे.

या हंगामात वऱ्हाडात तीनही जिल्ह्यांचा विचार केल्यास आठ लाख हेक्टरपेक्षा अधिक क्षेत्रावर सोयाबीन लागवड झाली अाहे. काही ठिकाणी सोयाबीन सोंगणीला सुरवात झाली. अागामी दसऱ्यापर्यंत हा हंगाम जोरात सुरू होणार अाहे. या वर्षी पावसात खंड पडल्याने बहुतांश ठिकाणी सोयाबीनचे उत्पादन सुमारे ४० टक्क्यांपेक्षा अधिक घटण्याची चिन्हे अाहेत. एकरी पाच ते सात पोत्यांचा सरासरी उतारा मिळण्याची शक्यता शेतकरी वर्तवित अाहेत.

चांगला हंगाम राहिल्यास उत्पादन एकरी नऊ ते १२ क्विंटलपर्यंत राहते. यंदा त्यात घट शक्य अाहे. एकीकडे असे असताना उत्पादन खर्च मात्र वाढला अाहे. सोंगणीची मजुरी २०० ते ३०० रुपयांनी एकरी वाढली. मळणीचाही दरही थ्रेशर चालकांनी वाढविला अाहे. शिवाय मजुरांची समस्या असल्याने अधिक पैसे देऊन मजूर पळविण्याचे प्रकार होण्याची चिन्हे अाहेत. सध्या मजुरांची बुकींग केली जात अाहे. मजुरी देतानाच त्यांना शेतापर्यंत ने-अाण करण्यासाठी वाहनाचा वेगळा खर्चही काही भागातील शेतकऱ्यांना सहन करावा लागणार अाहे.