दुर्मिळ धातूंच्या शोधासाठी गेल्या काही वर्षामध्ये सागरी तळाशी होणाऱ्या खोदकामांचा परिणाम समुद्रातील अन्नसाखळीवर मोठ्या प्रमाणात होत असल्याचे मॅक्स प्लॅंक सागरी सूक्ष्मजीवशास्त्र संस्थेच्या संशोधनात पुढे आले आहे. सध्या अशा खोदकामासंदर्भात स्पष्ट असे कोणतेही निकष, नियम वा निर्बंध नसल्याचा फायदा उचलला जात आहे. मात्र, या गोष्टीचा दीर्घकालीन परिणाम सागरी तळाशी असलेली कर्बाच्या साखळी व सूक्ष्मजीवांवर होत आहे. सागरी तळ ही सर्वसामान्यांच्या दृष्टीने अत्यंत दूरची आणि दुर्लक्ष करण्याजोगी बाब असली तरी नैसर्गिकरित्या हा रहिवास आपल्या जीवनाशी जागतिक कार्बन साखळीच्या माध्यमातून जोडला गेलेला आहे. या सागरी तळाशी असलेल्या विविध महत्त्वाच्या धातूंचे (पॉलीमेटॅलिक) आर्थिक मूल्य लक्षात आल्याने या रहिवासामध्ये माणसांद्वारे मोठे छेडछाड केली जात आहे. आंतरराष्ट्रीय संशोधकांच्या गटामध्ये जर्मनीतील मॅक्स प्लॅंक सागरी सूक्ष्मजीवशास्त्र संस्थेतील शास्त्रज्ञ तान्जा स्ट्रॅटमॅन आणि स्कॉटलॅंड येथील हेरीयॉट- वॉट विद्यापीठातील डॅनियल डी जोंग यांच्यासह नेदरलॅंड येथील युट्रेच्ट विद्यापीठातील संशोधकांचा समावेश होता. या संशोधकांनी पेरू येथील सुमारे ३ हजार कि.मी. सागरी किनाऱ्यालगतच्या सागरी तळाशी असलेल्या अन्नसाखळीचा अभ्यास केला. त्यावर विविध खोदकामांचा होणारा परिणाम तपासला. सूक्ष्मजीवांच्या माध्यमातून होणाऱ्या कर्बाच्या साखळीचा परिणाम मोठ्या सजीवांवर तुलनेने कमी होतो.

सागरी तळ हे हवामान बदलासाठी संवेदनशील