बुलडाणा ः येत्या हंगामात बीबीएफ तंत्रज्ञानाने पेरणी करण्याबाबत जनजागृती वाढत आहे. मेहकर तालुक्यातील विश्वी येथे आयोजित शेतीशाळेत बीबीएफ तंत्रज्ञानाचे प्रात्यक्षिक कृषी विभागाने दाखविल्यानंतर त्याचे फायदे लक्षात घेता येथील शेतकऱ्यांनी याच तंत्राने पेरणी करण्याचा निर्धार केला.  या वेळी उपविभागीय कृषी अधिकारी नारायण देशमुख, तालुका कृषी अधिकारी सत्येन्द्र चिंतलवाड, देऊळगावराजा तालुका कृषी अधिकारी श्री. मासाळकर व प्रमुख मार्गदर्शक शेतीशाळा तज्ज्ञ विठ्ठल धांड यांची उपस्थिती होती. शेतीशाळेत शेतकऱ्यांना सोयाबीन उत्पादकता वाढीच्या दृष्टीने रुंद सरी वरंबा पद्धत म्हणजे बीएफ तंत्रज्ञानाचे सखोल असे मार्गदर्शन करण्यात आले.  या वेळी श्री. देशमुख यांनी बीबीएफ तंत्रज्ञानाचे फायदे विषद करताना या तंत्रज्ञानामुळे सोयाबीन पिकाला आवश्यक पाण्याची गरज पूर्ण होत असल्याचे सांगितले. शेतीशाळेला उपस्थित शेतक-यांनी हंगामात प्रत्येकी किमान एक एकर सोयाबीन पेरणी या तंत्रज्ञानाने करण्याचा निर्धार केला. संतोष गायकवाड यांनी आभार मानले.