जळगाव  ः जिल्ह्यात सोमवारी मतदानाच्या दिवशी १४ ईव्हीएम मशिन, १४ कंट्रोल युनिट, तर ६६ ठिकाणी व्हीव्हीपॅट मशिन बंद पडल्याने काही वेळ मतदान बंद पडले होते. लागलीच रिझर्व्ह असलेले ईव्हीएम मशिन, कंट्रोल युनिट व व्हीव्हीपॅट मशिन बदलण्यात आले आहेत. बंद पडलेल्या काळात मतदान केंद्रांवर फारशी गर्दी नसल्याने मतदारांना अधिक वेळ वाट पाहावी लागली नसल्याची माहिती निवडणूक उपजिल्हाधिकारी तुकाराम हुलवळे यांनी दिली. 

सर्वांत अगोदर रावेर मतदारसंघात काही मशिन बंद पडल्याच्या घटना घडल्या. नंतर तांत्रिक अडचणीमुळे मशिन बंद झाल्याचे प्रकार घडले. मात्र लागलीच ईव्हीएम मशिन, कंट्रोल युनिट, व्हीव्हीपॅट मशिन बदलून देण्यात आले. 

खानापुरातील केंद्रात व्हीव्हीपॅट पडले बंद  दरम्यान, पुणे जिल्ह्यातील खानापूर (ता. भोर) येथील मतदान केंद्रातील व्हीव्हीपॅट मशिन बंद पडल्याने मतदारांच्या रांगा लागल्या. प्रशासनाने त्वरित हालचाली करून पंधरा मिनिटांमध्ये नवीन व्हीव्हीपॅट मशिन बसविले आणि मतदान प्रक्रिया पुन्हा सुरू केली. 

उरळगावात ईव्हीएम मशीन पडले बंद शिरूर तालुक्‍याच्या पूर्व भागातील उरळगावात एक तास ईव्हीएम मशिन बंद पडल्याने नागरिकांना एक तास ताटकळत बसावे लागले. नवीन ईव्हीएम मशिन आणल्यानंतर एक तासाने मतदान सुरू झाले.