नाशिक : राज्य सरकारचा महत्त्वाकांक्षी प्रकल्प असलेल्या समृद्धी महामार्गाच्या भूसंपादनासाठी जिल्ह्यातील १९ गावांमधील २१३ हेक्टर क्षेत्राच्या अधिग्रहणाची अंतिम अधिसूचना रस्ते विकास महामंडळाने शुक्रवारी प्रसिद्ध केली. यामुळे आता भूसंपादन कायद्यान्वये जमीन संपादित करणे प्रशासनाला शक्य होणार आहे.

नागपूर ते मुंबई हे अंतर काही तासांमध्ये पार करता यावे, यासाठी समृद्धी महामार्गाचा महत्त्वाकांक्षी प्रकल्प राज्य सरकारने हाती घेतला आहे. जिल्ह्यातील सिन्नर आणि इगतपुरी तालुक्यांमधून हा महामार्ग जाणार असून, त्यासाठी आतापर्यंत ९०० हेक्टर जमीन थेट खरेदीद्वारे संपादित करण्यात आली आहे. परंतु, कौटुंबिक वाद, न्यायालयीन प्रकरणे आणि प्रकल्पासाठी जमीन देण्यास असणारा विरोध यांमुळे २१३ हेक्टर जमीन अजूनही अधिग्रहित होऊ शकलेली नाही. त्यामुळे २०१३ च्या भूसंपादन कायद्यान्वये या जमिनी अधिग्रहित करण्याची तयारी प्रशासनाने सुरू केली होती. आता भूसंपादन कायद्यान्वये जमिनी अधिग्रहित करण्यात येणार असल्याने जमीनमालकांना चारपट मोबदला मिळणार आहे.

भूसंपादन कायद्यान्वये सिन्नर आणि इगतपुरी तालुक्यांतील धामणगाव, गंभीरवाडी, बेलगाव तऱ्हाळे, धामणी, पिंपळगाव मोर, उभाडे, देवळे, खैरगाव, शेनवड बु., कांचनगाव, अवचितवाडी, तळोघ, तळोशी, पिंप्री सद्रोद्दिन, नांदगाव सदो, तारांगण पाडा, फांगुळ गव्हाण, बोर्ली आणि वाघ्याची वाडी आदी गावांमधील जमिनी संपादित करण्यात येणार आहेत.