पुणे  ः मराठा समाजाला आरक्षण मिळालेच पाहिजे, मराठा आंदोलकांवरील गुन्हे मागे घ्यावेत, शेतकऱ्यांना हमीभाव मिळालाच पाहिजे, अशा घोषणा देत रविवारी (ता. २९) पुण्यात मराठा क्रांती मोर्चा काढण्यात आला. मोर्चात हजारोंच्या संख्येने युवक सहभागी झाले होते. त्यामुळे बहुतांशी भागात वाहतूक बंद होती.

सकाळी अकरा वाजता मराठा क्रांती मोर्चाला सुरवात झाली. डेक्कन जिमखान्याजवळ छत्रपती संभाजी महाराज यांच्या पुतळ्याला महिला आंदोलकांच्या हस्ते पुष्पहार अर्पण करण्यात आला. त्यानंतर जिजाऊ वंदना गाऊन मोर्चाला सुरवात झाली. आरक्षणासाठी सुरू असलेल्या आंदोलनादरम्यान मृत्यूमुखी पडलेल्या काकासाहेब शिंदे यांना या वेळी श्रद्धांजली अर्पण करण्यात आली.

मोर्चाच्या पार्श्वभूमीवर पुण्यातील काही भागात व्यापाऱ्यांनी दुकाने बंद ठेवली होती. मोर्चाच्यावेळी कोणताही अनुचित प्रकार घडू नये, म्हणून मोठा पोलिस बंदोबस्त ठेवण्यात आला होता. राज्यात मराठा आंदोलकांवर मोठ्या प्रमाणात गंभीर गुन्हे दाखल करण्यात आले आहेत. हे गुन्हे मागे घेण्यात यावेत. तसेच मराठा समाजाची आरक्षणाची मागणी पूर्ण करावी, यासाठी निषेध रॅली काढण्यात आली होती.

मराठा समाजाच्या मागण्या मान्य न झाल्यास ९ आॅगस्टला क्रांतीदिनी तीव्र आंदोलन छेडण्यात येईल, असा इशाराही मराठा क्रांती मोर्चाच्या समन्वयकांनी दिला. दरम्यान, आरक्षणाच्या मागणीसाठी सकल मराठा समाजाने आज (ता. ३०) सोलापूर बंदची हाक दिली आहे.