सातारा : येत्या खरीप हंगामात  सोयाबीनचे  घरचे बियाणे वापरणे शेतकऱ्यांना फायद्याचे ठरणार असल्याचे मत  कृषी सहाय्यक अंकुश सोनावले यांनी व्यक्त केले.

 नागठाणे येथे सोयाबीन बियाणे अंकुरण क्षमता तपासणी प्रात्यक्षिक प्रसंगी बोलत होते. या वेळी प्रगतशील  शेतकरी सुनील नारायण साळुंखे, राम साळुंखे उपस्थित होते.

 सोनावले म्हणाले, ‘‘सध्या सोयाबीनचे दर वाढले आहेत. त्यामुळे बरेच शेतकरी स्वतःसाठी सुद्धा बियाणे न ठेवता संपूर्ण सोयाबीनची बाजारात विक्री करीत आहेत. त्यामुळे आज तत्कालीन फायदा दिसत असला तरी खरीप हंगामात त्याचा तोटा शेतकऱ्यांना होऊ शकतो. 

खुल्या बाजारात  सोयाबीनची विक्रमी दर वाढ झाल्यामुळे या वर्षी खरीप हंगामात सोयाबीन बियाणे दर सुद्धा मोठ्या प्रमाणात वाढण्याची शक्यता आहे.  काही वेळेस चांगले बियाणे मिळणे कठीण होऊ शकते. खरीप हंगामातील अशा बिकट परिस्थितीमध्ये शेतकरी मिळेल ते बियाणे घेऊन पेरणी करतात आणि त्याचा उगवण क्षमता व पर्यायाने उत्पादनावर विपरीत परिणाम होऊन आर्थिक नुकसान होण्याची शक्यता असते. 

ज्यांच्याकडे फुले संगम, फुले किमया, डी एस -२२८, फुले अग्रणी,  जे एस ३३५ या वाणाचे चांगले प्रतीचे सोयाबीन आहे. ’’

शेतकऱ्यांना चांगला आर्थिक फायदा

या वर्षी जिल्हा अधीक्षक कृषी अधिकारी गुरुदत्त काळे, कृषी उपसंचालक विजयकुमार राऊत, तालुका कृषी अधिकारी अजित पिसाळ, युवराज काटे, रोहिदास तिटकारे यांच्या मार्गदर्शनातून  उन्हाळी हंगामातील सोयाबीनची जी  प्रात्यक्षिके  घेतली आहेत. त्याची काढणी झाल्यानंतर एक आठवड्यांनंतर या पद्धतीने अंकुरण क्षमता तपासणी करून योग्य ते सोयाबीन बियाणे म्हणून शेतकरी गट, कंपनीमार्फत  विकल्यास शेतकऱ्यांना चांगला आर्थिक फायदा होईल, असेही त्यांनी सांगितले.