अंबाजोगाई : ‘‘विद्यापीठाकडून विकसित परभणी शक्ती या वाणात लोह व जस्त या घटकांचे प्रमाण इतर वाणाच्या तुलनेत अधिक आहे. यामुळे शरीराची रोगप्रतिकारक शक्ती वाढते. कोरोना काळात याचा मानवी शरीराला फायदा होऊ शकतो. परभणी शक्ती वाणाच्या नियमित सेवनाने पोषण सुरक्षा साध्य करण्यास मदत होणार आहे,’’ असे मत वसंतराव नाईक मराठवाडा कृषी विद्यापीठाचे संचालक संशोधन डॉ. दत्तप्रसाद वासकर यांनी व्यक्त केले.

अंबाजोगाई कृषी विज्ञान केंद्राने ज्वार संशोधन केंद्र, वसंतराव नाईक मराठवाडा कृषी विद्यापीठ, परभणी अंतर्गत ज्वारीच्या विविध वाणांचे प्रथमदर्शनी प्रात्यक्षिके आयोजित केली आहेत. यात परभणी शक्ती या वाणाची प्रात्यक्षिके घेण्यात आली. जवळबन, (ता. केज) येथे संदीप करपे याच्या शेतातील प्रक्षेत्रास डॉ. वासकर आणि संशोधन उपसंचालक डॉ. अशोक जाधव यांनी भेट दिली. शास्त्रज्ञ कृष्ण कर्डिले, डॉ. रवींद्र कोरके, अक्रम शेख, राजा दहिभाते, शेतकरी उपस्थित होते. 

भेटी दरम्यान पिकाची पाहणी करण्यात आली. शेतकऱ्यांशी चर्चा करून त्यांचे अभिमत घेण्यात आले. डॉ. वासकर यांनी ज्वारीचा दैनंदिन आहारात उपयोग व्हावा, यासाठी त्याचे मार्केटिंग करण्याबाबत, परभणी शक्ती या वाणाचे गुणवैशिष्टे शेतकऱ्यांमध्ये प्रसारित करण्याबाबत मार्गदर्शन केले. परभणी येथील ज्वार संशोधन केंद्राचे डॉ. कांबळे यांचेही सहकार्य लाभले.