परभणी : अतिवृष्टीमुळे जमिनी खरडून गेल्या आहेत. पिके वाहून गेली आहेत. नुकसानग्रस्त शेतकऱ्यांना हेक्टरी ५० हजार रुपये मदत द्या. सोयाबीनच्या मध्य हंगामी पीकविमा परताव्यासाठी सर्व ५२ मंडळांचा समावेश करावा आदी मागण्यासाठी स्वाभिमानी शेतकरी संघटनेच्या मंगळवारी (ता.२१) परभणी, जलालपूर (ता. परभणी), गंगाखेड येथे रास्ता रोको आंदोलन करण्यात आले.  जुलै, सप्टेंबर महिन्यांतील अतिवृष्टी, तसेच ऑगस्ट महिन्यातील पावसाचा दीर्घ खंड यामुळे जिल्ह्यातील शेती पिकांचे आतोनात नुकसान झाले आहे. त्यामुळे तत्काळ आर्थिक मदत करावी. पीकविमा भरपाई मंजूर करावी. साखर कारखान्यांकडील थकीत एफआरपीची रक्कम व्याजासह देण्यात यावी. स्थानिक आपत्ती नुकसानअंतर्गत ७२ तासांच्या आत तक्रार देण्याची अट रद्द करावी आदी मागण्यासाठी स्वाभिमानी शेतकरी संघटनेचे जिल्हाध्यक्ष किशोर ढगे, डिंगबर पवार, शेख जाफर, मुंजाभाऊ लोडे, रामप्रसाद गमे, भास्कर खटिंग, केशव आरमळ, बाळासाहेब घाटोळ, प्रसाद गरुड, रामभाऊ आवरगंड, माउली लोडे, विकास भोपाळे आदींसह शेतकऱ्यांनी रास्ता रोको आंदोलन केले.