नागपूर : शिवसेनेने भाजप सोबत युती केली नाही तर शिवसेनेत मोठी फूट पडेल. त्यामुळे उद्धव ठाकरे यांनी याबाबत पुनर्विचार करावा. शिवसेनेने भाजपसोबत युती केली नाही तरी रिपाइं मात्र भाजपसोबत राहील, असे रिपाइं (आ.) गटाचे नेते केंद्रीय मंत्री रामदास आठवले यांनी स्पष्ट केले.

नागपूर दौऱ्यावर असलेल्या रामदास आठवले यांनी पत्रकारांशी संवाद साधला. आठवले म्हणाले, शिवसेनेचे संजय राऊत, सुभाष देसाई यांच्याशी आपण चर्चा केली आहे. पंतप्रधानांनी या मुद्द्यावर शिवसेनेशी बोलावे, अशी त्यांची अपेक्षा आहे. आपण पंतप्रधान नरेंद्र मोदी यांच्या कानावर ही बाब टाकली आहे. ते लवकरच उद्धव ठाकरे यांच्याशी चर्चा करणार आहेत.

या वेळी रामटेक लोकसभा लढविणार १९९८ मध्ये आपण दक्षिण-मध्य मुंबईमधून निवडणूक जिंकलो होतो. या वेळी भाजप-शिवसेना युती झाली तर त्याच मतदारसंघातून लढण्याचा आपला विचार आहे. मात्र युती झाली नाही तर रामटेक लोकसभा मतदारसंघातून लढण्याची इच्छा आहे. आपण याबाबत केंद्रीय मंत्री नितीन गडकरी यांच्याशीदेखील चर्चा केली आहे. मी विदर्भवादी आहे, त्यामुळे या मतदारसंघात मला विरोध होणार नाही, असा दावाही रामदास आठवले यांनी केला.

सर्व घटकांना जोडणार २७ मे रोजी पुणे येथे रिपाइंचे राष्ट्रीय अधिवेशन होत आहे. या अधिवेशनाला मुख्यमंत्री देवेंद्र फडणवीस, केंद्रीय मंत्री नितीन गडकरी यांना निमंत्रित करण्यात आले आहे. पुढील काळात दलितांसह ओबीसी, मराठा, मुस्लिम अशा सर्वच समाजातील घटकांना पक्षासोबत जोडण्याचा प्रयत्न केला जाईल. या सर्वांना सोबत घेऊन गावागावात शाखा उघडण्यात येतील, असेही रामदास आठवले म्हणाले.