जळगाव  ः खानदेशात मागील तीन दिवसांपासून भिज पाऊस सुरू आहे. त्यामुळे जमिनीतील ओलावा वाढण्यास मदत झाली आहे. खरीप पिकांसाठी हा पाऊस उपयुक्त ठरत असल्याचे चित्र आहे.

जळगाव जिल्ह्यातील चोपडा, यावल, रावेर, मुक्ताईनगर, भुसावळ, जामनेर, पारोळा, अमळनेर, धरणगाव, जळगाव, भडगाव, चाळीसगाव, असा सर्वत्र पाऊस झाला आहे. धुळ्यातही साक्री, धुळे, शिरपूर, शिंदखेडा तालुक्यात गेल्या २४ तासांत चांगला पाऊस झाला. तर, नंदुरबारात सातपुड्यातील अक्कलकुवा, धडगाव येथेही पाऊस झाला. नवापूर, तळोदा, शहादा व नंदुरबारातही पाऊस झाला. सातपुड्यातील उदय नदीला चांगले प्रवाही पाणी आले आहे.  तळोदा भागातून जाणाऱ्या खरडी नदीलाही चांगले प्रवाही पाणी आहे. तर, सातपुड्यातून येणारी सुसरी, गोमाई नदीदेखील प्रवाही आहे. कुठेही अतिवृष्टी झालेली नाही. 

भिज पावसामुळे जमिनीत पाणी मुरत आहे. जळगाव जिल्ह्यात सरासरीच्या ६५ टक्के, धुळ्यात ६७ टक्के, तर नंदुरबारातही ६८ टक्के पाऊस झाला आहे. जळगाव जिल्ह्यात एकूण ७६५ मिलीमीटर पाऊस अपेक्षित असतो. यातील ४०० मिलीमीटरपेक्षा अधिक पाऊस झाला आहे. 

मनुदेवीतील धबधबा  प्रवाही 

सातपुडा पर्वतातील यावलमधील मनुदेवी येथील धबधबा  प्रवाही झाला आहे. तर, चाळीसगावमधील पाटणादेवी भागातील धवलतीर्थ धबधबादेखील प्रवाही आहे. गेल्या २४ तासांत सर्वाधिक ३८ मिलीमीटर पाऊस चोपडा तालुक्यात झाला आहे. तर, जळगाव जिल्ह्यातील इतर तालुक्यांमध्येही १८ मिलीमीटरपेक्षा अधिक पाऊस झाला आहे. धडगाव येथे ४५ मिलीमीटर पाऊस झाला, अशी माहिती मिळाली.