अमरावती: घरुन मोजून आणलेली तूर बाजार समितीच्या इलेक्‍ट्रॉनिक काट्यावर कमी भरली. याप्रकरणी चौकशी करून कारवाई व्हावी, अशी मागणी राहुल अहीर या शेतकऱ्याने केली आहे.  चांदूरबाजार येथील कनिराम अहिर यांनी २४ जानेवारीला आपली तूर चांदूरबाजार बाजार समितीत विक्रीसाठी पाठविली होती. बाजारात तूर  पाठविण्याआधी तिचे घरीच इलेक्‍ट्रॉनिक काट्यावर वजन करण्यात आले. १३ क्‍विंटल ३६ किलो असे या तुरीचे वजन होते. दुसऱ्या दिवशी तुरीचा लिलाव होऊन मोजमाप करण्यात आले. त्या वेळी कनिराम अहिर यांचा मुलगा राहुल उपस्थित होता. लिलावापासून ते मोजमापापर्यंत सर्व सोपस्कार पूर्ण झाल्यानंतर तुरीचे वजन त्यांना सांगण्यात आले. या वेळी ५१ किलो तूर कमी भरल्याची माहिती त्यांना देण्यात आली. या तुरेच बाजारमूल्य २ हजार ५०० रुपये आहे. घरून मोजून आणलेली तूर बाजार समितीच्या काट्यावर कमी भरल्याने शेतकरी राहुल अहिर यांनी याप्रकरणाची रितसर तक्रार चार दिवसांनी बाजार समितीकडे दिली. त्याआधारे बाजार समिती प्रशासनाकडून नोंद घेत चौकशी सुरू केली आहे. खरेदीदार व शेतकऱ्याला समोरासमोर बसवून निर्णय घेतला जाणार आहे.