पुणे : अरबी समुद्रातीन तीव्र कमी दाबाचे क्षेत्र (डीप्रेशन) आणि मध्य प्रदेश आणि महाराष्ट्रात असलेली चक्राकार वाऱ्यांची स्थिती यामुळे गुरुवारपासून (ता. १५) राज्यात पावसाची शक्यता अाहे. तर रविवारपर्यंत (ता. १८) राज्यात सर्वदूर पावसाचा अंदाज वर्तविण्यात आला आहे. बुधवारी राज्यात ढगाळ हवामान तयार झाल्याने अनेक ठिकाणी दुपारपासून अंधारून आले होते.

अरबी समुद्रात असलेले तीव्र कमी दाबाचे क्षेत्र बुधवारी सकाळी साडेआठ वाजता मिनिकाॅय बेटांपासून अग्नेय दिशेला १३० किलाेमीटर, तर तिरुअनंतपुरमच्या नैर्ऋत्य दिशेला ३४० किलोमीटर अंतरावर होते. ताशी १४ किलाेमीटर वेगाने वायव्येकडे सरकणारे क्षेत्राची तीव्रता गुरुवारपर्यंत कायम राहणार असून, त्यानंतर ते निवळत जणाार आहे. अरबी समुद्रात कमी तीव्रतेच्या वादळाची शक्यताही मावळली असल्याचे हवामान विभागाने स्पष्ट केले.

बुधवारी सकाळपर्यंतच्या २४ तासांमध्ये भिरा येथे राज्यातील उच्चांकी ४१ अंश सेल्सिअस तापमानाची नोंद झाली. तर बुधवारी दुपारनंतर असलेल्या ढगाळ हवामानामुळे मध्य महाराष्ट्र, मराठवाड्यात उन्हाची ताप कमी झाली होती. गुरुवारी कोकण, मध्य महाराष्ट्र, विदर्भात पाऊस पडणार असून, शुक्रवारपासून राज्यात अनेक ठिकाणी हलका ते मध्यम पाऊस पडण्याचा अंदाज वर्तविण्यात आला आहे.

बुधवारी (ता. १४) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३७.३, जळगाव ३८.६, कोल्हापूर ३५.७, महाबळेश्वर ३१.६, मालेगाव ३९.०, नाशिक ३६.५, सांगली ३७.०, सातारा ३५.७, सोलापूर ३८.४, मुंबई ३३.३, रत्नागिरी ३५.८, डहाणू ३२.७, भिरा ४१.०, औरंगाबाद ३६.६, परभणी ३८.४, नांदेड ३७.०, अकोला ३८.६, अमरावती ३७.६, बुलडाणा ३८.०, चंद्रपूर ३८.६, गोंदिया ३७.२, नागपूर ३८.५, वर्धा ३९.०, यवतमाळ ३७.५.