पुणे  : राज्यात वाढलेले उन्हाचा ताप सोमवारपर्यंत (ता. २) कायम राहणार आहे. मराठवाड्यात शनिवारी (ता. ३१) ढगाळ हवामानासह तुरळक ठिकाणी हलक्या पावसाची शक्यता आहे, तर राज्याच्या उर्वरीत भागात हवामान उष्ण व कोरडे राहण्याचा अंदाज वर्तविण्यात आला आहे. शुक्रवारी सकाळपर्यंतच्या २४ तासांमध्ये राज्यात अकोला येथे उच्चांकी ४२.५ अंश सेल्सिअस तापमानाची नोंद झाली.  गेल्या काही दिवसांमध्ये राज्यात उन्हाच्या झळा वाढल्या आहेत. विदर्भ, मराठवाड्यात जवळपास सर्वच ठिकाणी तापमानाचा पारा ४० अंशांच्या वर गेला आहे, तर उत्तर महाराष्ट्रातही उन्हाचा ताप वाढला आहे. तर राज्याच्या सर्वच भागात दिवस रात्रीच्या तापमानात तफावत टिकून आहे. सोमवारपर्यंत राज्यातील उन्हाचा चटका कायम राहण्याची शक्यता आहे, तर मध्य महाराष्ट्रापासून कोमोरीन भागापर्यंत हवेचा कमी दाबाचा पट्टा सक्रिय असल्याने शनिवारी (ता. ३१) मराठवाड्यात ढगाळ हवामान होऊन तुरळक ठिकाणी पाऊस पडण्याचा अंदाज आहे.  शुक्रवार (ता. ३०) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल, किमान तापमान (अंश सेल्सिअसमध्ये) : पुणे ३८.६, नगर ४१.०, जळगाव ४१.८, कोल्हापूर ३५.५, महाबळेश्वर ३२.६, मालेगाव ४१.०, नाशिक ३०.६, सांगली ३७.०, सातारा ३८.७, सोलापूर ४१.६, मुंबई ३२.०, अलिबाग ३१.६, रत्नागिरी ३१.६, डहाणू ३३.२, आैरंगाबाद ३९.४, परभणी ४१.९, नांदेड ४२.०, अकोला ४२.५, अमरावती ४१.०, बुलडाणा ३९.०, चंद्रपूर ४२.४, गोंदिया ४०.२, नागपूर ४०.९, वर्धा ४१.९, यवतमाळ ४१.५.