औरंगाबाद : पावसाची अवकृपा मराठवाड्यातील पाणीटंचाईच्या झळा तीव्र करण्यास कारणीभूत ठरली आहे. गत आठवड्याच्या तुलनेत टंचाईग्रस्त गाव-वाड्यांच्या संख्येत २२ ची भर पडली असून, पाणीपुरवठा करणाऱ्या टॅंकरची संख्याही २१ ने वाढविण्यात आली आहे. शिवाय गत आठवड्याच्या तुलनेत १६ विहिरींचेही अधिग्रहण टॅंकर व थेट पाणीपुरवठ्यासाठी वाढविण्यात आले आहे.

मराठवाड्यात यंदा भीषण दुष्काळाचे संकट ओढविते की काय अशी स्थिती आहे. संपूर्ण पावसाळ्यात प्रदीर्घ खंड व आता परतीचा पाऊसही औरंगाबाद, जालना, बीड, लातूर, उस्मानाबाद व परभरणी जिल्ह्यांतील बहुतांश भागांवर मेहरबान झाला नाही. त्यामुळे अशीच स्थिती कायम राहिल्यास पिकांबरोबरच पिण्याच्या पाण्याचे संकट अधिक तीव्र होण्याची शक्‍यता नाकारता येत नाही.

औरंगाबाद व जालना जिल्ह्यांत गत आठवड्यात फुलंब्री, पैठण, गंगापूर, वैजापूर, सिल्लोड, भोकरदन, जाफ्राबाद, परतूर आदी तालुक्‍यांतील १४२ गाव व ३ वाड्यांना पाणीटंचाईची झळ सहन करावी लागत होती. त्यासाठी १५५ टॅंकरची सोय करण्यात आली होती. औरंगाबाद, जालना व उस्मानाबाद या तीन जिल्ह्यांत जवळपास १६५ विहिरींचे टॅंकरसह थेट पाणीपुरवठ्यासाठी अधिग्रहणही करण्यात आले होते.

२४ सप्टेंबर अखेर औरंगाबाद व जालना जिल्ह्यांतील टंचाईग्रस्त गावे, वाड्यांच्या संख्येत २२ ची भर पडून ती संख्या १६४ गाव-वाड्यांवर पोचली आहे. टंचाईग्रस्त गाव, वाड्यांची संख्या वाढल्याने गत आठवड्यात पाणीपुरवठा करणाऱ्या १५५ टॅंकरची संख्याही २१ ने वाढून १७६ वर पोचली आहे. औरंगाबाद, जालना व उस्मानाबाद या तीन जिल्ह्यांत पाणीपुरवठ्यासाठी १८१ खासगी विहिरींचे अधिग्रहण करण्यात आले आहे. त्यामध्ये औरंगाबाद जिल्ह्यातील ९९, जालना जिल्ह्यातील ४४ व उस्मानाबाद जिल्ह्यातील ३८ विहिरींचा समावेश आहे.