जळगाव : खानदेशात धुळे, नंदुरबारसह जळगाव जिल्ह्यात सुमारे २० टॅंकर्स सुरू आहेत. टॅंकरची संख्या वाढत असून, जळगाव जिल्ह्यात १२ टॅंकर सुरू आहेत. तीव्र टंचाईग्रस्त गावांची संख्या खानदेशात ३० पर्यंत पोचली आहे. पुढे ही स्थिती आणखी बिकट बनेल, असे संकेत आहेत.

तापी काठावरील चोपडा, यावल, रावेर, मुक्ताईनगर, भुसावळ, जळगाव, अमळनेर, शहादा, नंदुरबार, शिरपूर आदी तालुक्‍यांमधील गावांमध्ये स्थिती बरी आहे. परंतु गिरणाकाठावरील मोठ्या गावांमध्ये पाणीकपातीचे संकट आहे. जळगाव जिल्ह्यातील पश्‍चिम भागातील पाचोरा, पारोळा, अमळनेर, चाळीसगाव, भडगाव, तर दक्षिण भागातील जामनेर, बोदवडमध्ये स्थिती बिकट आहे. जळगाव जिल्ह्यात १७ गावांमध्ये तीव्र टंचाई आहे. अमळनेर तालुक्‍यात ही गावे अधिक आहेत. दोन दिवसाआड पाणीपुरवठा होणारी गावे जवळपास २०० पेक्षा अधिक आहेत.

धुळे जिल्ह्यातही सुमारे सहा गावांमध्ये टंचाईची समस्या आहे. शिंदखेडा, साक्री तालुक्‍यांत जलसंकट अधिक आहे. नंदुरबार जिल्ह्यातही सुमारे सात गावांमध्ये टंचाईस्थिती भीषण आहे. कोळदा, पळाशी, लहान शहादे या नंदुरबारपासून अगदी जवळ असलेल्या गावांमध्ये टंचाई वाढली आहे. पुढे ही समस्या वाढेल. कारण जलस्रोत आटू लागले आहेत. सध्या ऑक्‍टोबर हीटचा फटका बसत असून, रब्बीच्या पेरणीसाठी फारसे अनुकूल वातावरण नाही. कृत्रिम जलसाठे उपलब्ध असलेल्या भागातही पुढे फेब्रुवारी, मार्चमध्येच जलसंकट वाढेल. यामुळे केळी लागवड पाचोरा, भडगाव, जळगाव, जामनेर भागात कमी होईल, असे संकेत आहेत. कारण जामनेरातील तोंडापूर प्रकल्पात फक्त ५ टक्के साठा आहे.

वाघूरमध्येही फक्त ४६ टक्के जलसाठा आहे. पाणीटंचाई वाढत आहे. परंतु प्रशासन टंचाई आराखडा मार्गी लावत नसल्याचे चित्र आहे. अनके अधिकारी गैरहजर असतात. यामुळे कामे ठप्प होत असल्याच्या तक्रारी वाढत आहेत.