बुलडाणा : मृग नक्षत्रात पावसाला सुरवात झाल्याने शेतकऱ्यांमध्ये समाधान होते. या वर्षी वेळेत पेरण्या होतील अशी सर्वांना अपेक्षा होती. मात्र नंतरच्या काळात पावसात खंड पडल्याने जून महिना संपायला अाला तरी या जिल्ह्यातील पेरण्या २० टक्क्यांपर्यंतही पोचू शकलेल्या नाहीत. ८० टक्के क्षेत्र दमदार पावसाची प्रतीक्षा करीत पेरणी वाचून तसेच पडून अाहे.

बुलडाणा जिल्ह्याचे सरासरी पेरणी क्षेत्र सात लाख ४८ हजार ८०० हेक्टर असून, २८ जूनपर्यंत यापैकी १ लाख २० हजार हेक्टरवर पेरण्या झाल्या अाहेत. सरासरीच्या अवघ्या १६ टक्के क्षेत्रावर ही पेरणी झाली. जिल्ह्यात अातापर्यंत सरासरीच्या एकूण साडेबारा टक्केच पाऊस पडला अाहे. जिल्ह्यात सार्वत्रिक स्वरूपातील पाऊस नसल्याने पेरण्या रखडल्या अाहेत. ज्या भागात पाऊस पडतो तिकडे पेरण्यांची कामे शेतकरी सुरू करतात.   

जिल्ह्यात सध्याची स्थिती पाहली तर संग्रामपूर, जळगाव जामोद, नांदुरा, शेगाव, या तालुक्यांमध्ये जून महिन्यातील अपेक्षित पावसाच्या अवघा १० टक्केही पाऊस पडलेला नाही. परिणामी या तालुक्यांमध्ये पेरण्यांची कामे पूर्णतः रखडलेली अाहेत. उर्वरित तालुक्यांचा विचार केला तर घाटावर पावसाने बऱ्यापैकी हजेरी लावली. मात्र हा पाऊसही तितकासा जोरदार व समाधानकारक नाही.  

जूनमध्ये पाऊस पडल्यानंतर प्रामुख्याने मका, कपाशी या पिकाच्या लागवडीला पोषक स्थिती मानली जाते. या महिन्यातील लागवड असेल तर उत्पादन चांगले येऊ शकते. अाता जून महिला लोटला तरी सार्वत्रिक पाऊस झालेला नाही. यामुळे जिल्ह्यात मका, कपाशीच्या लागवडीला फटका बसण्याची शक्यता अाहे. ही दोन्ही पिके चांगला पैसा देणारी अाहेत. त्यातही मक्यासारखे पीक घेऊन अनेक शेतकरी रब्बीत दुसऱ्या पिकाची लागवड करीत असतात. यंदा पावसाअभावी मक्याचे लागवड क्षेत्र घटण्याची शक्यता अाहे. या परिस्थितीत हे क्षेत्र सोयाबीन लागवडीखाली येऊ शकते, असा कृषी तज्ज्ञांचा अंदाज अाहे.      

तालुकानिहाय पावसाची टक्केवारी (२८ जूनची अाकडेवारी) ः बुलडाणा १७.११, चिखली १६.१८, देऊळगावराजा १३.३०, सिंदखेडराजा १७.१८, लोणार १५.७७, मेहकर १५.४३, खामगाव  १२.४३, शेगाव  ९.३८, मलकापूर १५.४२, नांदुरा ७.२९,  मोताळा १३.५७, संग्रामपूर ४.६८, जळगाव जामोद १०.१७, एकूण १३.२ टक्के.