पुणे : विभागात टंचाईच्या झळांमध्ये सातत्याने वाढ होत आहे. पुणे, सातारा, सांगली, सोलापूर जिल्ह्यातील १२ तालुक्यांमध्ये ६४ गावे ४४७ वाड्यांमध्ये तीव्र टंचाई भासत आहे. या टंचाईग्रस्त भागातील सुमारे १ लाख २० हजार लोकसंख्या आणि १४ हजार पशुधनासाठी ६५ टॅंकरने पाणीपुरवठा करण्यात येत असल्याची माहिती विभागीय आयुक्त कार्यालयातर्फे देण्यात आली.

पुणे आणि सातारा जिल्ह्यात सप्टेंबर महिन्यापासूनच टंचाई भासू लागली होती. त्यापाठोपाठ आता सांगली आणि सोलापूरलाही टंचाईच्या झळा बसू लागल्या आहेत. भूजलाची पातळी खालावू लागल्याने विहिरी, बोअरवेल कोरडे पडले आहेत. पिण्याच्या पाण्याचे स्त्रोतही आटल्याने माणसांबरोबरच जनावरांनाही टंचाईच्या झळा बसत आहेत. पुणे जिल्ह्यातील सर्वाधिक ५३ हजार, साताऱ्यातील ४९ हजार, सांगलीतील १३ हजार आणि सोलापुरातील सुमारे ४ हजार लोकसंख्येला आणि सातारा सोलापुरातील १३ हजार ९२१ जनावरांना टॅंकरने पाणी पुरवावे लागत आहे.

यंदा सातारा जिल्ह्यात सर्वाधिक टंचाई असून, ३८ गावे १९५ वाड्यांना ३४ टॅंकरने पाणी देण्यात येत आहे. यात माण तालुक्याच्या सर्वाधिक २९ गावे १८५ वाड्यांतील २६ टॅंकरचा समावेश आहे. पुणे जिल्ह्यातील १७ गावे १९१ वाड्यांमध्ये २३ टॅंकरने पाणीपुरवठा सुरू आहे. सांगलीतील ६ गावे ३२ वाड्यांना ५ टॅंकरने तर सोलापूरच्या माढा तालुक्यातील ३ गावे २९ वाड्यांना ३ टॅंकरने पाणी देण्यात येत आहे. तर कोल्हापूर जिल्ह्यात अद्याप टंचाई भासत नसल्याचे विभागीय आयुक्त कार्यालयातर्फे सांगण्यात आले.

टंचाईग्रस्त भागात सुरू असलेल्या टॅंकरची तालुकानिहाय संख्या पुणे    बारामती १०, शिरूर ८, पुरंदर २, जुन्नर २, दौंड १. सातारा    माण २६, खटाव ५, फलटण २, कोरेगाव १. सांगली    खानापूर ३, आटपाडी २. सोलापूर    माढा ३.