उस्मानाबाद : मराठवाड्यातील पाणीटंचाई आता केवळ उस्मानाबाद जिल्ह्यापुरती मर्यादित आहे. हे टंचाईग्रस्त गावे व टॅंकरच्या संख्येवरून स्पष्ट झाले आहे.

प्राप्त माहितीनुसार, २२ जून अखेरपर्यंत मराठवाड्यातील ९८ गावे व ७५ वाड्यांना पाणीटंचाईचा सामना करावा लागत होता. या टंचाईग्रस्त गावांना पाणीपुरवठा करण्यासाठी प्रशासनाकडून १४२ टॅंकरने पाणीपुरवठा सुरू होता.२९ जून अखेरपर्यंत टंचाईग्रस्त गावांची संख्या घटली. २९ जून अखेरपर्यंत मराठवाड्यातील ५९ गावे व ४४ वाड्यांना पाणीटंचाईचा सामना करावा लागत होता.

टंचाईचा सामना करणाऱ्या वाड्यांना पाणीपुरवठा करण्यासाठी टॅंकरची सोय करण्यात आली होती. सतत झालेल्या पावसामुळे आता पुन्हा एकदा टंचाईची स्थिती कमी झाली आहे. केवळ उस्मानाबाद जिल्ह्यातील बारा गावांतील ही टंचाई कायम राहिली आहे. उस्मानाबाद जिल्ह्यातील १२ गावांना पाणीपुरवठा करण्यासाठी १६ टँकरची सोय करण्यात आली आहे. 

टॅंकर व टँकर  व्यतिरिक्त पाणीपुरवठ्यासाठी २०१ विहिरींचे अधिग्रहण करण्यात आले आहे. त्यात टँकरसाठी १६, तर टँकर व्यतिरिक्त पाणीपुरवठ्यासाठी १८५ विहिरीचे अधिग्रहण करण्यात आले आहे.

उस्मानाबाद तालुक्यातील एका गावासह उमरगा तालुक्यातील २, भूममधील ३ व परंडा तालुक्यातील ६ गावांना पाणीटंचाईचा सामना करावा लागत आहे. त्यासाठी उस्मानाबाद तालुक्यात एक, उमरगा तालुक्यात ५ भूम तालुक्यात ४, तर परंडा तालुक्यात ६ टॅंकरच्या फेऱ्या सुरू आहेत. टँकर व्यतिरिक्त पाणीपुरवठा करण्यासाठी अधिग्रहीत करण्यात आलेल्या विहिरींमध्ये उस्मानाबादमधील ९९, तुळजापूर १४, उमरगा ४१, धूम १४, तर परंडा तालुक्यातील ३३ विहिरींचा समावेश आहे.