नगर ः नगर जिल्ह्यातील मुळा धरणाच्या पाणलोटात पाऊस काहीसा कमी झाल्याने मुळा धरणाचा विसर्ग दोन दिवसांपासून बारा हजार क्युसेकवर स्थिर ठेवला आहे. दरम्यान पावसाने शेतपिकांचे नुकसान होतच आहे. अनेक भागात सततच्या पावसामुळे जमिनीतून निचरा होत नसलेले पाणी साठवून राहत असल्याने पिके सडली आहे. रविवारी (ता. २०) सायंकाळी कर्जत तालुक्यातील काही भागात जोरदार पाऊस झाला.

नगर जिल्ह्यातील सर्व धरणे भरली आहेत. सर्वांत मोठ्या असलेल्या मुळा धरणाच्या पाणलोटात पाऊस सुरू असल्याने चार दिवसांपूर्वी मुळा धरणातून वीस हजार क्युसेकने पाण्याचा विसर्ग केला जात होता. मात्र, दोन दिवसांपासून पाणलोटात पाऊस काहीसा कमी झाल्याने रविवारपासून धरणातील व विसर्ग बारा हजार क्युसेकवर स्थिर ठेवला आहे. मात्र, सलग दहा-बारा दिवसांपासून पाऊस सुरुच असल्याने खरिपातील पिकांचे नुकसान होतच आहे.

सोयाबीन, बाजरी, भुईमूग, कापसासह कांदा रोपांना मोठा फटका बसत आहे. अनेक भागात सततच्या पावसाने शेतीत पाणी साठवून राहत आहे. पाण्याचा निचरा होत नसल्याने जमिनी चिभडल्या जात असून पिकेही सडू लागली आहेत. प्रशासनाकडून पंचनामे केले जात असल्याचे सांगितले जात असले तरी सप्टेंबर महिन्यात सर्वाधिक नुकसान झाले आहे. मात्र, नेमके किती नुकसान झाले याची माहिती मात्र कृषी विभागाकडे नाही.

रविवारी कर्जत तालुक्यातील काही गावांत जोरदार पाऊस झाला. या पावसाने शेतातील पिके वाहून गेली आहेत. सततच्या पावसाने खरिपातील बहुतांश पिके संकटात आली आहेत.