नगर   : जिल्ह्यातील नागरिकांची तहान भागविण्यासाठी प्रशासनातर्फे ८२२ टॅंकरद्वारे पाणीपुरवठा सुरू आहे. तीव्र पाणीटंचाईमुळे दिवसेंदिवस टॅंकरची संख्या वाढत आहे. श्रीरामपूरवगळता जिल्ह्यातील १३ तालुक्‍यांतील ५६६ गावे व ३१८२ वाड्या-वस्त्यांवरील १३ लाख ४२ हजार ५७९ नागरिकांना पाणीपुरवठ्यासाठी रोज ८२२ टॅंकर धावत आहेत. 

गेल्या वर्षी अपुरा पाऊस झाल्याने दुष्काळाचे सावट दिवसेंदिवस गहिरे होत आहे. ग्रामीण भागातील टंचाईग्रस्त गावांतून टॅंकरमागणीच्या प्रस्तावांच्या संख्येत वेगाने वाढ होत आहे. सध्या श्रीरामपूरवगळता जिल्ह्यात टॅंकरद्वारे पाणीपुरवठा करण्यात येत आहे. पाथर्डी तालुक्‍यात सर्वाधिक १५३ टॅंकरद्वारे १०७ गावे व ६०८ वाड्या-वस्त्यांवरील दोन लाख ४२ हजार ५१९ नागरिकांना पाणीपुरवठा करण्यात येतो. राहुरी तालुक्‍यात केवळ तीन टॅंकरद्वारे तीन गावांमधील एक हजार ६०४ नागरिकांना पाणीपुरवठा सुरू आहे. 

२००३ नंतर मागील वर्षी जिल्ह्यात सरासरीच्या तुलनेत सर्वांत कमी पाऊस झाला. त्यामुळे भूजल पातळीत घट झाली. पिण्याच्या पाण्यासाठी टॅंकर सुरू करण्याची वेळ जिल्हा प्रशासनावर आली. उन्हाच्या झळा वाढतील तसतशी टॅंकरची मागणी झपाट्याने वाढत आहे. कोणत्याही स्थितीत नागरिकांची पिण्याच्या पाण्याची अडचण होणार नाही, याची दक्षता घेण्याचा आदेश जिल्हाधिकारी राहुल द्विवेदी यांनी अधिकाऱ्यांना दिला आहे.