भंडारा  ः वाघाच्या दहशतीमुळे शेतीकामे प्रभावित झाल्याने या वाघाचा बंदोबस्त करण्याच्या मागणीसाठी गावकऱ्यांनी तीन तास ठिय्या आंदोलन केले. सिहोरा बस स्थानकासमोर करण्यात आलेल्या या आंदोलनामुळे वाहतूक प्रभावित झाली होती.  महाराष्ट्र आणि मध्य प्रदेशच्या सीमेवर असलेल्या बिनाखी, गोंदेखारी परिसरात काही दिवसांपासून एका पट्टेदार वाघाने दहशत पसरविली आहे. शनिवारी (ता.२५) या वाघाने भर दिवसा दुचाकीस्वारांवर हल्ला केला; तसेच एका तरुणावरदेखील झडप घातली. गोंदेखारी येथे यापूर्वी एका इसमावर या वाघाने हल्ला केला होता. या घटनांमुळे बपेरा जिल्हा परिषद क्षेत्रातील नागरिकांमध्ये भीतीचे वातावरण आहे. दरम्यान, शेतीची कामेदेखील ठप्प झाली आहेत. अशातच रविवारी (ता.२६) सायंकाळी सात वाजता बिनाखी गावशिवारातील राईइस मिलमध्ये हा वाघ शिरला. मील मालक अनिल रहांगडाले यांनी वनविभागाला याची माहिती दिली; परंतु कोणीही तिकडे फिरकले नाही. त्यामुळे नागरिक संतप्त झाले. वाघाचा बंदोबस्त करावा, यासाठी चुल्हाड बस स्थानकासमोर गावकऱ्यांनी ठिय्या आंदोलन केले. जिल्हा परिषदेचे माजी उपाध्यक्ष रमेश पारधी, उमेश तुरकर, माजी सभापती कलाम शेख यांनी या आंदोलनाचे नेतृत्व केले.  अखेर आंदोलन मागे सहायक वनसंरक्षक मल्होत्रा, उपवनसंरक्षक विवेक होशिंग वनपरिक्षेत्र अधिकारी लुचे यांनी आंदोलनाला भेट दिली. आंदोलकांशी या वेळी चर्चा करण्यात आली. वाघाचा बंदोबस्त करण्यासाठी पाच पथके तयार करण्यात आल्याची माहिती त्यांनी दिली. त्यानंतर आंदोलन मागे घेण्यात आले.