नंदुरबार  ः महात्मा फुले कर्जमुक्ती योजनेअंतर्गत नांदर्खे आणि खोंडामळी येथील पात्र शेतकऱ्यांची यादी सोमवारी (ता. २४) प्रसिद्ध करत आधार प्रमाणीकरणास सुरुवात करण्यात आली. जाहीर झालेल्या यादीत नांदर्खेच्या  २२२ आणि खोंडामळीच्या २१२ शेतकऱ्यांचा समावेश आहे. दरम्यान, पात्र शेतकरी कर्जमुक्तीनंतर एप्रिलपासून पुढील हंगामासाठी कर्ज घेण्यास पात्र ठरणार आहेत.  मुख्यमंत्री उद्धव ठाकरे आणि उपमुख्यमंत्री अजित पवार यांच्या उपस्थितीत मुंबई येथे पात्र शेतकऱ्यांची पहिली यादी जाहीर झाली, त्यात वरील दोन्ही गावांचा समावेश आहे. तेथील आपले सरकार सेवा केंद्र, विविध कार्य सोसायटी शाखा, जिल्हा बॅंक शाखा अशा विविध ठिकाणी ही यादी प्रदर्शित करण्यात आली. आधार प्रमाणीकरणाची प्रक्रिया इतरही गावांमध्ये तातडीने सुरू करण्यात येणार आहे.  यादीनुसार पात्र शेतकऱ्यांचे आधार प्रमाणिकरण करण्यात येत असून प्रमाणिकरण प्रमाणपत्र वितरित करण्यात येत आहे. प्रमाणपत्र प्राप्त शेतकऱ्यांना शासनातर्फे कर्जमुक्तीचा लाभ देण्यात येणार आहे. प्रमाणिकरण करताना खाते क्रमांक, आधार आणि बोटांचे ठसे यावरून माहिती तपासण्यात येत आहे.  जिल्हा उपनिबंधक अशोक चाळक आणि सहायक उपनिबंधक निरज चौधरी यांनी दोन्ही गावांना भेट देऊन प्रमाणिकरण प्रक्रियेची माहिती घेतली. तहसीलदार भाऊसाहेब थोरात यांच्या हस्ते खोंडमाळी येथे प्रातिनिधीक स्वरूपात आधार प्रमाणिकरण प्रमाणपत्र वितरण करण्यात आले. मंगळवारीदेखील ही प्रक्रिया सुरू राहणार आहे. पात्र शेतकऱ्यांनी आधार प्रमाणिकरण करून घ्यावे, असे आवाहन जिल्हा प्रशासनातर्फे करण्यात आले आहे.