यवतमाळ : शेतकरी पितापुत्राच्या आत्महत्येनंतर प्रशासनाने या कुटुंबाला दिलेल्या आश्‍वासनाची पूर्तता गेल्या वर्षभरात झाली नसल्याचे वास्तव समोर आले आहे. अशा कोडगेपणामुळेच आत्महत्याग्रस्त जिल्ह्यांमध्ये आशावाद निर्माण करण्यात सरकार अपयशी ठरत असल्याचा आरोप या पार्श्‍वभूमीवर शेतकरी नेते मनीष जाधव यांनी केला आहे.  तीन एकर कोरडवाहू शेती, परिणामी वाढलेला कर्जाचा बोजा, नापिकी, कुटुंबातील सदस्यांचे आजारपण या कारणांमुळे शेतकरी काशीराम मुधोळकर आणि त्यांचा मुलगा अनिल यांनी एकाच झाडाला गळफास लावत आत्महत्या केली होती. गेल्या वर्षी २३ ऑगस्ट २०१६ रोजी ही दुर्देवी घटना घडली. आजही या कुटुंबावर २७ हजार रुपयांचे खासगी कर्ज आहे. कुटुंबातील सहा सदस्यांच्या गरजा भागविण्याचे आव्हानदेखील कायम आहे.  दरम्यान, पितापुत्राच्या आत्महत्येनंतर प्रशासनात एकच खळबळ उडाली. आमदार राजू तोडसाम, महसूल राज्यमंत्री संजय राठोड, आमदार ख्वॉजा बेग, माजी मंत्री संजय देशमुख, आमदार बच्चू कडू, विलास पाटील, विधान परिषदेचे उपसभापती माणीकराव ठाकरे यांनी या कुटुंबीयांची सांत्वनपर भेट घेतली. लोकप्रतिनिधींच्या दौऱ्यानंतर या कुटुंबांचे दुःख काहीसे दूर होईल, असे वाटत होते; परंतु आजही समस्यांच्या जोखडात हे कुटुंब असल्याचे वास्तव आहे.  योजनेतील विहीर अपूर्णच  काशीराम मुधोळकर यांच्या पत्नी अनुसयाबाईने दिलेल्या माहितीनुसार, त्यांना रोजगार हमी योजनेतून विहीर देण्यात आली. गेल्या वर्षभरात ती पूर्ण झाली नाही. ५० कोंबड्या देण्यात आल्या; त्यातील ३५ पहिल्याच आठवड्यात आजारपणामुळे मेल्या. एक लाखाच्या चेकचा लाभ तो तेवढा मिळाला; मात्र प्रशासनाकडून सुनील या मुलास नोकरीचे आश्‍वास देण्यात आले होते. त्याची पूर्तता अद्यापही झालेली नाही.