सांगली : जिल्ह्यात कृष्णा व वारणेला आलेल्या महापुरामुळे महावितरणचे २०५२ खांब कोसळले आहेत. महावितरण कंपनीला प्राथमिक पाहणीनुसार ३५ कोटी रुपयांच्या नुकसानीचा झटका बसला आहे. महापुराचे पाणी असतानाही महावितरणच्या जिगरबाज कर्मचाऱ्यांनी धोका पत्करून वीज पुरवठा सुरळीत करण्याची कामगिरी बजावली.    जिल्ह्यात कृष्णा व वारणेला आलेल्या महापुरामुळे शिराळा, वाळवा, पलूस, मिरज तालुक्यांतील अनेक गावे पाण्याखाली गेली होती. त्यामुळे महावितरणने पुराच्या पाण्यात विजेचा धोका निर्माण होऊ नये. म्हणून वीज पुरवठा खंडित केला. जसे पुराचे पाणी ओसरेल त्याप्रमाणे आवश्यक त्या ठिकाणी वीजपुरवठा सुरळीत केला जात आहे. जिल्ह्यात महापुरामुळे ९४ गावे बाधित झाली होती, तर ९७ हजार ग्राहकांच्या वीज पुरवठ्यावर त्याचा परिणाम झाला होता. पूर ओसरल्यानंतर आतापर्यंत ९१ गावांचा वीजपुरवठा सुरळीत करण्यात आला आहे. उर्वरित गावांत अद्याप पुराचे पाणी आहे. ९७ हजार ग्राहकांपैकी ८० हजार ग्राहकांचा वीजपुरवठा आतापर्यंत सुरू करण्यात आला आहे.  २००५, २०१९ मध्ये आलेल्या महापुरावेळी बराच भाग पाण्यात राहिल्यामुळे विजेचे खांब पडणे, वाकणे, वितरण रोहित्र, वाहिन्या खराब होणे आदी प्रकारामुळे कोट्यवधी रुपयांचे नुकसान झाले होते. यंदाच्या २०२१च्या महापुराचा पुन्हा एकदा महावितरणला फटका बसला आहे. जिल्ह्यातील उच्च दाब वाहिनीचे ७१७ विद्युत खांब पडले आहेत. लघुदाब वाहिनीचे १३३५ खांब पडलेत. २५१९ वितरण रोहित्र पाण्याखाली गेल्यामुळे ती नादुरुस्त बनली आहेत. १३२ वीज वाहिन्यांचे नुकसान झाले आहे. तर १७ उपकेंद्रे पाण्याखाली असल्यामुळे तेथेही मोठे नुकसान झाले आहे. महावितरणने पूर ओसरल्यानंतर केलेल्या प्राथमिक पाहणीत जवळपास ३५ कोटी रुपयांचे नुकसान झाले आहे. नुकसानीचा हा आकडा आणखी वाढण्याची शक्यता आहे. कोरोनाच्या काळात महावितरणला मोठा फटका बसला आहे. थकबाकीचा आकडा वाढतच चालला आहे. त्यामुळे महावितरणसमोर आर्थिक अडचणी वाढत चालल्या आहेत. तशातच आता महापुराचाही झटका बसला आहे. अशाही अडचणीच्या परिस्थितीत महावितरणने पूरग्रस्त भाग वगळता इतर भागात अखंडित वीज पुरवठा दिला आहे. तर दुसरीकडे पूर ओसरलेल्या ठिकाणी वीज सुरू केली जात आहे.