वाशिम ः राज्यात या वर्षी हळदीचा हंगाम आशादायक राहण्याचा अंदाज आहे. यामुळे विदर्भात हळदीचे माहेरघर असलेल्या वाशीम जिल्ह्यातील शेतकऱ्यांना दिलासा मिळला. या वर्षी सुरवातीला हळदीचे दर साडेसात हजार ते ८ हजार रुपये क्‍विंटल राहतील, अशी शक्‍यता शिरपूर जैन (जि. वाशीम) येथील हळद उत्पादक डॉ. गजानन ढवळे यांनी व्यक्‍त केली होती. वाशीम जिल्ह्याने सोयाबीनसोबतच गेल्या काही वर्षांत हळद उत्पादनाच्या बाबतीत नवी ओळख मिळविली आहे. लागवड क्षेत्र वाढते असल्याने रिसोड व वाशीम बाजार समितीत आठवड्यातील ठराविक दिवशी हळद खरेदी होते; परंतु स्थानिक बाजारात विकण्याऐवजी हिंगोली बाजारपेठेत शेतकरी हळद विक्रीला प्राधान्य देतात. या वर्षी आंध्र प्रदेश आणि तमिळनाडू राज्यात हळदीखालील कमी झालेले लागवडक्षेत्र त्यासोबतच पाण्याच्या उपलब्धतेचा फटका बसत महाराष्ट्रातदेखील उत्पादन कमी होण्याचा अंदाज आहे. त्यामुळे हळदीला चांगले दर राहतील, असा अंदाज आहे.  गेल्या वर्षी हळदीचे दर साडेचार ते पावणेपाच हजार रुपये प्रतिक्‍विंटलवर पोचले होते. २०१७ च्या जुलैनंतर ऑगस्ट, सप्टेंबरमध्ये दरात वाढ होण्यास सुरवात हाेत हे दर ९ ते साडेनऊ हजार रुपयांवर पोचले. या वर्षी सांगली बाजारात नव्या हळदीची आवक झाली. त्या वेळी मुहूर्तला साडेतेरा हजार रुपये क्‍विंटलचा दर मिळाला होता. आता हे दर साडेआठ ते नऊ हजार रुपये क्‍विंटलवर स्थिरावल्याचे डॉ. गजानन ढवळे यांनी सांगितले. एप्रिलपासून होतो हंगाम सुरू निझामाबाद ही हळदीकरिता मोठी पेठ आहे. तेथील आवक दरावर परिणाम करणारी ठरते. महाराष्ट्रातदेखील एप्रिलपासून हंगाम जोरात सुरू होतो. मार्चमध्ये काढणी त्यानंतर तीन आठवड्यांची सरासरी प्रक्रिया करून हळद बाजारात पोचते. आंध्र प्रदेश तसेच सांगली परिसरात पूर्वहंगामी म्हणजेच अक्षयतृतीयेला लागवड होते. त्याची आवक जानेवारीत सुरू होते. उर्वरित भागात दीड महिन्यानंतर लागवड होते. त्यामुळे बाजारातील आवकदेखील उशिरा होते. जानेवारीच्या पहिल्या आठवड्यापर्यंत दर चांगले राहतात. संक्रातीनंतर दर कमी होतात, असा शेतकऱ्यांचा अनुभव आहे.