नाशिक : लासलगाव कृषी उत्पन्न बाजार समितीच्या प.पू. भगरीबाबा धान्य भाजीपाला मुख्य बाजार आवारात चालू हंगामातील टोमॅटो लिलाव सोमवारी (ता. २) सुरू झाले आहेत. लिलावाचे दिवशी एकूण १७९० क्रेट्स टोमॅटो विक्रीस आले. कमीत कमी १५१, जास्तीत जास्त ६०१, तर ३४१ रुपये सरासरी प्रति क्रेट्स भाव मिळाला.  

बाजार समितीच्या सभापती सुवर्णा जगताप, सदस्य सचिव नरेंद्र वाढवणे, टोमॅटो व्यापारी शिवाजी जगताप, भगवान सरोदे, बापू धरम यांच्या हस्ते टोमॅटो क्रेट्सचे विधीवत पूजन करण्यात आले. मुहूर्तावर वाहेगांव साळ (ता. चांदवड) येथील शेतकरी प्रशांत धोंडीराम लुकारे यांचा टोमॅटो हा शेतीमाल ६०१ प्रति क्रेट्स या दराने बागवान फ्रूट कंपनी यांनी खरेदी केला. सुवर्णा जगताप म्हणाल्या, की लासलगाव बाजारपेठ कांद्याबरोबर टोमॅटो, डाळिंब व भाजीपाल्यासाठीही नावारूपास येत आहे. त्याचप्रमाणे टोमॅटो शेतीमालास स्पर्धात्मक बाजारभाव मिळावे म्हणून टोमॅटो खरेदीदार, निर्यातदार, व्यापाऱ्यांची संख्या वाढविण्यावर बाजार समितीचा भर राहणार असून, लिलावानंतर शेतकऱ्यांना तातडीने रोख चुकवती केली जाणार आहे. 

तसेच टोमॅटो लिलावात नव्याने सहभागी होऊ इच्छीणाऱ्या खरेदीदार तसेच निर्यातदार, व्यापाऱ्यांनी परवान्यासाठी बाजार समितीच्या मुख्य कार्यालयाशी संपर्क साधावा, असे आवाहन करण्यात आले. याप्रसंगी टोमॅटो व्यापारी मच्छिंद्र काळे, फहीम अब्दुल बारी मोमीन, हैदर पठाण, सागर आहेर, संजय साळुंके, तनवीर शेख, सचिन देशमुख, सुधीर मोरे, शरद हिरे, नंदकिशोर व्यास, अशोक नेटारे, दीपक केदारे, बाजार समितीचे सहायक सचिव अशोक गायकवाड, सर्व लिलाव प्रमुख सुनील डचके, प्रभारी हिरालाल सोनारे, पंकज होळकर, नामदेव बर्डे, दिगंबर कासव, प्रमोद कुलकर्णी यांच्यासह टोमॅटो उत्पादक शेतकरी बांधव मोठ्या संख्येने उपस्थित होते. 

टोमॅटो उत्पादकांनी आपला टोमॅटो शेतीमाल मोठा, मध्यम, लहान (गोल्टी), बदला (बिलबिला, तडकलेला, खरचटलेला) अशी योग्य प्रतवारी करून २० किलोच्या क्रेट्समध्ये विक्रीस आणावा, असे आवाहन सचिव नरेंद्र वाढवणे यांनी केले.