सोलापूर : कसबा गणपती शेतकरी संघटनेतर्फे बुधवारी (ता. २७) कारहुणवीनिमित्त बैलजोड्यांची मिरवणूक काढण्यात येणार आहे. याच वेळी कृषिनिष्ठ जीवनगौरव पुरस्कारांचे वितरणही केले जाणार आहे, अशी माहिती केदार मेंगाणे यांनी दिली.

बाळीवेस येथील श्री कसबा गणपती मंदिरात सायंकाळी सहा वाजता मिरवणुकीस प्रारंभ होईल. माजी केंद्रीय गृहमंत्री सुशीलकुमार शिंदे यांच्या हस्ते मिरवणुकीचे उद्‌घाटन आणि पुरस्कारांचे वितरण होईल. या वेळी श्री सिद्धेश्‍वर यात्रेचे प्रमुख मानकरी राजशेखर हिरेहब्बू, कॉँग्रेसचे शहराध्यक्ष प्रकाश वाले, सिद्धेश्‍वर देवस्थान पंच समितीचे विश्‍वस्त संजय थोबडे, मल्लिनाथ मसरे, सोमनाथ भोगडे, सुधीर थोबडे, नंदकुमार मुस्तारे व नगरसेवक आनंद चंदनशिवे उपस्थित राहणार आहेत.

कसबा गणपती मंदिर, टिळक चौक, होटगी स्वामी रस्तामार्गे निघणाऱ्या या मिरवणुकीची सांगाता कसबा गणपती मंदिर येथे होणार आहे.

या शेतकऱ्यांचा होणार गौरव : यंदा आनंद मेंगाणे आणि सिद्धेश्‍वर जोकारे (सोलापूर), लोकेश विभुते (दर्शनाळ, ता. अक्कलकोट) यांना कृषिनिष्ठ पुरस्कार देऊन गौरविण्यात येणार आहे. याबरोबरच श्री बृहन्मठ होटगी संस्थेतर्फे कृषी जीवनगौरव पुरस्कार देऊन राजशेखर गुंगे (देगाव) यांना गौरविण्यात येणार आहे. नामदेव दुधभाते आणि कोंडाजी चौधरी यांचा गुंगे परिवारातर्फे रोख बक्षीस देऊन सन्मान होणार आहे.