नगर  : मुख्यमंत्री देवेंद्र फडणवीस यांच्या नेतृत्वाखालील भाजपच्या महाजनादेश यात्रेचा तिसरा टप्पा नगर जिल्ह्यातून सुरू होणार आहे. ही यात्रा शुक्रवारी (ता. १३) व शनिवारी (ता. १४) नगर जिल्ह्यात येणार आहे. त्यात शुक्रवारी अकोले, संगमनेर आणि राहुरी येथे मुख्यमंत्र्यांची जाहीर सभा होईल. त्याच दिवशी सायंकाळी नगरमध्ये ‘रोड शो’ होणार असल्याचे जिल्हाध्यक्ष भानुदास बेरड यांनी सांगितले. यात्रेच्या तिसऱ्या टप्प्यात सात जिल्ह्यांचा समावेश आहे. 

विधानसभा निवडणुकीच्या पार्श्‍वभूमीवर मुख्यमंत्री देवेंद्र फडणवीस राज्यात महाजनादेश यात्रा काढून लोकांशी संवाद साधत आहेत. मागील आठवड्यात भाजपचे ज्येष्ठ नेते अरुण जेटली यांच्या निधनामुळे महाजनादेश यात्रेतील अकोले, संगमनेर, राहुरी येथील जाहीर सभा व नगरमधील ‘रोड शो’ रद्द करण्यात आला होता. त्यामुळे आता महाजनादेश यात्रेचा तिसरा टप्पा सुरु होत आहे. शुक्रवारी सकाळी अकोले, दुपारी साडेबाराला संगमनेर येथे आणि दुपारी तीनला राहुरी येथे सभा होणार आहे.

सायंकाळी नगर येथील ‘रोड शो’नंतर मुख्यमंत्री नगरमध्ये मुक्काम करणार आहेत. शनिवारी (ता. १४) सकाळी मुख्यमंत्री पत्रकारांशी संवाद साधतील. त्यानंतर काष्टीमार्गे (ता. श्रीगोंदा) यात्रा दौंडला जाणार असून, तेथे सभा होणार आहे. बारामती, उरुळीकांचन येथून हडपसर, पुणे येथे महाजनादेश यात्रा जाईल. पुण्यातील मुक्कामानंतर रविवारी (ता. १५) भोर, वाईवरून सातारा येथे यात्रा पोहोचेल. त्यानंतर सातारा येथे सभा होईल. कराडला सभा व मुक्काम असेल.

सोमवारी (ता. १६) कराड येथे पत्रकारांशी संवाद साधून पळूसला सभा होईल. तासगाव, मिरज, सांगलीवरून यात्रा शिरोळ येथे पोहोचेल. शिरोळ येथे सभा होईल. त्यानंतर इचलकरंजी, हातकणंगलेवरून कोल्हापूरला येथे यात्रा पोहोचेल. कोल्हापूरला मुख्यमंत्र्यांचा मुक्काम असेल. त्यानंतर मंगळवारी (ता. १७) कोल्हापूरला पत्रकारांशी संवाद साधून कणकवलीत व रत्नागिरीत सभा होणार आहे.