पुणे : राज्यात अनेक ठिकाणी तापमान ३६ ते ३९ अंशांच्या दरम्यान असल्याने उन्हाचा चटका कायम आहे. बुधवारी (ता. १३) सकाळपर्यंतच्या २४ तासांमध्ये विदर्भातील ब्रह्मपुरी ४०.२ अंश सेल्सिअस तापमानाची नोंद झाली आहे. तर विदर्भात आज (ता. १४) हलक्या पावसाला पोषक हवामान असून, उन्हाचा ताप वाढण्याची शक्यता वर्तविण्यात आली आहे.  विदर्भ आणि परिसरावर चक्राकार वारे वाहत असून, या स्थितीपासून मराठवाडा, उत्तर कर्नाटकापर्यंत ९०० मीटर उंचीवर हवेच्या कमी दाबाचा पट्टा सक्रिय होता. यातच अरबी समुद्रावरून होत असलेल्या बाष्पाचा पुरवठ्याने राज्यात ढगाळ हवामान होत आहे. बुधवारी दुपारी कोकण, मध्य महाराष्ट्र, मराठवाड्यासह राज्यात अंशत: ढगाळ हवामान होते. उद्या (ता. १४) विदर्भातील भंडारा, गोंदिया, गडचिरोली, नागपूर जिल्ह्यांत हलक्या पावसाची शक्यता आहे. उन्हाचा चटका चांगलाच वाढला असून, बुधवारी सकाळपर्यंतच्या २४ तासांमध्ये सोलापूर, परभणी, अमरावती, चंद्रपूर येथे तापमान ३९ अंशांच्या वर तर सांगली, बीड, नांदेड, उस्मानाबाद, नागपूर, वर्धा, यवतमाळ ३८ अंशांपेक्षा अधिक कमाल तापमानाची नोंद झाली.  बुधवारी (ता. १३) सकाळी साडेआठ वाजेपर्यंतच्या २४ तासांत राज्यातील विविध ठिकाणचे कमाल, कंसात किमान तापमान (अंश सेल्सिअसमध्ये) : पुणे ३६.२ (१६.०), जळगाव ३६.० (१८.२), कोल्हापूर ३६.३ (२१.७), महाबळेश्वर ३१.९ (१६.५), मालेगाव ३५.२ (१८.८), नाशिक ३४.३ (१६.४), सांगली ३८.० (१८.७), सातारा ३६.० (१८.३), सोलापूर ३९.६ (२३.१), अलिबाग २८.५ (२०.७), डहाणू २९.७ (१९.०), सांताक्रूझ ३०.८ (२०.०), रत्नागिरी ३०.२ (२१.४), औरंगाबाद ३५.७ (२०.०), बीड ३८.४ (२०.२), नांदेड ३८.५ (२३.०), उस्मानाबाद ३८.१ (२२.०), परभणी ३९.० (२२.५), अकोला ३७.८ (२१.०), अमरावती ३९.८ (२१.०), बुलडाणा ३४.० (२१.८), चंद्रपूर ३९.६ (२७.०), गडचिरोली ३५.४ (२२.०), गोंदिया ३६.० (१५.९), नागपूर ३८.५ (१९.९), वर्धा ३८.५ (१९.९), वाशीम ३६.२ (२०.४), यवतमाळ ३८.५ (२२.८).