सोलापूर : पंढरपूर विकास प्राधिकरणाच्या प्रारूप विकास आराखड्यासंदर्भात प्राप्त झालेल्या सर्व सूचना, हरकतींची सुनावणी घ्यावी, अशा सूचना पालकमंत्री तथा पंढरपूर विकास प्राधिकरणाचे अध्यक्ष विजयकुमार देशमुख यांनी येथे दिल्या.

पंढरपूर विकास प्राधिकरणाच्या प्रारूप विकास आराखड्यासंदर्भात प्राप्त हरकतींवर सुनावणी घेण्यासाठी गठीत करण्यात आलेल्या समितीची बैठक जिल्हाधिकारी कार्यालयात पालकमंत्री विजय देशमुख यांच्या अध्यक्षतेखाली संपन्न झाली. बैठकीस आमदार बबनदादा शिंदे, आमदार प्रशांत परिचारक, जिल्हाधिकारी तथा प्राधिकरणाचे सदस्य सचिव डॉ. राजेंद्र भोसले, निवासी उपजिल्हाधिकारी संजय तेली, तज्ज्ञ सदस्य नगररचनाचे निवृत्त उपसंचालक एस. व्ही. सुर्वे, निवृत्त नगररचनाकार शेखर चव्हाण, श्रीकांत जहागिरदार उपस्थित होते.

पालकमंत्री देशमुख म्हणाले, "पंढरपूर विकास प्राधिकरण आराखड्यासंदर्भात मुदतीत ५८० आणि मुदतीनंतर ५५६ हरकती प्राप्त झाल्या आहेत. या सर्व हरकतींची सुनावणी घेण्यात यावी.

प्राधिकरणामार्फत विकास योजना राबविताना शेतकऱ्यांचे नुकसान होणार नाही, याची दक्षता घ्यावी. यासाठी प्राधिकरणाच्या सदस्यांनी रस्त्यांची, जागेची पाहणी करून तसा अहवाल प्राधिकरणास सादर करावा.

आवश्‍यक असणाऱ्या रस्त्यांची कामे घेण्यास प्राधान्य द्यावे. सर्व गावातील रेडीरेकनर उपलब्ध करून घ्यावा. भूसंपादन करताना राष्ट्रीय महामार्गाच्या धर्तीवर मोबदला देण्याबाबत आमदार बबनदादा शिंदे यांनी केलेल्या सूचनांचाही विचार करावा.''

हरकतींवर पुढील आठवड्यात सुनावणी होणार प्रशासनाकडे आलेल्या ५८० हरकतींची सुनावणी उपविभागीय अधिकारी कार्यालय, पंढरपूर यांच्या कार्यालयात ३, ४, १० व ११  मार्चला घेण्यात येणार आहे.मुदतीनंतर प्राप्त झालेल्या ५५६ हरकतींची सुनावणी २३, २४ व २५ मार्चला उपविभागीय अधिकारी कार्यालय, पंढरपूर येथे घेण्यात येणार आहे, अशी माहिती नगररचना विभागाचे सहाय्यक संचालक श्री. नाळे यांनी बैठकीत दिली.