सोलापूर : दुष्काळी परिस्थितीमुळे पशुधन जगविण्यासाठी शासन सर्वतोपरी मदत करण्यास तयार आहे. छावणी चालकांनीही छावणीतील जनावरांची काळजी घ्यावी, असे आवाहन पालकमंत्री विजयकुमार देशमुख यांनी केले. गेल्या दोन दिवसांपासून त्यांनी मंगळवेढ्यासह सांगोला तालुक्‍यातील चारा छावण्यांना भेटी दिल्या. 

सांगोल्यातील यलमार मंगेवाडी, अजनाळेसह मंगळवेढा तालुक्‍यातील भाळवणी, जालीहाळ, हाजापूर, गोणेवाडी, खुपसंगी, लेंडवे चिंचाळे येथील जनावरांच्या छावणीस व वाळलेल्या डाळिंब, द्राक्ष फळबागास भेट देऊन छावणीतील पशुपालकांशी त्यांनी संवाद साधला. या वेळी आमदार प्रशांत परिचारक, जिल्हाध्यक्ष शहाजी पवार, जिल्हा बॅंकेचे संचालक बबनराव आवताडे, औदुंबर वाडदेकर, श्रीकांत देशमुख, शशिकांत चव्हाण, नामदेव जानकर, राजेंद्र सुरवसे, मधुकर चव्हाण, तलाठी बाळासाहेब कोळी, कृषी सहायक मंगेश लातूरकर, नानासाहेब मोरे आदी उपस्थित होते. 

जनावरांच्या छावणीत चारापाणी मिळते का, याची त्यांनी पाहणी केली. याशिवाय दिल्या जाणाऱ्या चाऱ्याची व पशुखाद्याची तपासणी करत पशुखाद्याचे वितरण करण्यात आले.

वाडीवस्तीवर रस्ता नसल्याने टॅंकरचे पाणी मिळत नाही. तात्पुरत्या स्वरूपात रस्ता देण्याचे तहसीलदारांना आदेश द्यावेत, अशी मागणी नागरिकांनी केली. मधुकर चव्हाण यांनी पीकविमा भरपाई देताना तुरीची रक्कम मिळाली नसल्याचे सांगितले. सारवडे यांनी कांद्याचे अनुदान देण्याची मागणी केली.