सोलापूर : सोलापूर जिल्हा मध्यवर्ती बॅंक ही सर्वसामान्यांची आहे. ती वाचली पाहिजे. त्यासाठी थकीत कर्जवसुलीसाठी कागदी घोडे न नाचविता संबंधितांवर थेट कारवाई करावी, अशी मागणी स्वाभिमानी शेतकरी संघटनेचे नेते खासदार राजू शेट्टी यांनी केली.

सरकोली, ता. पंढरपूर येथे आयोजित शेतकरी मेळाव्यात ते बोलत होते. या वेळी संघटनेचे प्रदेशाध्यक्ष रविकांत तुपकर, माजी उपसभापती विष्णू बागल, समाधान फाटे, महामूद पटेल, शिवाजी पाटील, विजय रणदिवे, तानाजी बागल, सचिन पाटील, राहुल घुले, नवनाथ माने, किर्तीकुमार गायकवाड, अमर इंगळे, विश्रांती भुसनर, निवास भोसले आदी उपस्थित होते.

शेट्टी म्हणाले, ‘‘सोलापूर जिल्ह्यातील कारखानदार एफआरपीनुसार दर द्यावा लागत असल्याने साखर उतारा कमी दाखवित आहेत. त्याचा फटका सामान्य ऊस उत्पादक शेतकऱ्यांना बसत आहे. अद्यापही सोलापूर जिल्ह्यातील कारखानदारांकडे एफआरपीची कोटी रुपयांची रक्कम थकीत असून, ती मिळविण्यासाठी संघर्ष तीव्र केला जाईल.

दूधदराच्या घसरणीच्या प्रश्नाला केंद्र व राज्य सरकारचे चुकीचे धोरण जबाबदार आहे. केंद्रीय कृषिमंत्र्यांना दीड वर्षापूर्वी भेटून दूधदराचा प्रश्न मांडला होता. त्यांनी तो गांभीर्याने घेतला नाही. त्यामुळे राज्यातील दूध उत्पादकांचे नुकसान झाले आहे. राज्य सरकारने दूध उत्पादक शेतकऱ्याला थेट अनुदान द्यावे. दूधदरासाठी यापुढील काळात आरपारची लढाई उभी केली जाईल, असेही शेट्टी यांनी सांगितले.

 शेतकऱ्यांच्या नावावर कर्ज घेणाऱ्या कारखानदारांविरोधात आक्रमक राहणार आहोत. भीमा नदीच्या पाण्यासाठी संघर्ष निश्‍चित आहे. पोलिस प्रशासनाने शेतकऱ्यांच्या मुलांवर दंडुके उचलू नयेत. मुजोरी करणाऱ्यांना त्यांची जागा दाखविण्याची धमक शेतकऱ्यांच्या मुलांमध्ये आहे, असे तुपकर यांनी सांगितले.