पैठण, जि. औरंगाबाद  : ‘‘मोसंबीमधील लागवडीचे अंतर कमी करण्यासाठी आपले प्रयत्न सुरू आहेत. शिवाय मराठवाड्यात पैठण येथे लागवड, प्रक्रिया ते विक्रीपर्यंतचे मोसंबीचे १५ कोटी रुपयांचे क्‍लस्टर ‘मोसंबी उत्पादक शेतकरी सेवा केंद्र'' या नावाने सुरू करण्यात येईल,’’ अशी माहिती रोहयोमंत्री संदीपान भुमरे यांनी शुक्रवारी (ता.१४) दिली. 

चांगतपुरी फाटा (ता. पैठण) येथील गणेश मडके यांच्या शेतात कृषी विभागातर्फे ‘ठिबक सिंचन तंत्रज्ञान व कमी पाण्यात जास्त उत्पादन’ या विषयावर शेतकरी मेळावा घेण्यात आला. जनजागृती प्रतिष्ठानचे अध्यक्ष डॉ. भगवानराव कापसे, जिल्हा दूध सहकारी संघाचे उपाध्यक्ष नंदलाल काळे, सिंजेंटाचे के. सी. रवी,  पी. एस. जगदीशा, कापूसतज्ज्ञ डॉ. एस. एस. बैनाडे, डॉ. एस. बी. पवार, डॉ. किशोर झाडे, कृषी अभियांत्रिकी विषय विशेषज्ज्ञ प्रा. गीता यादव, त्र्यंबक पाथ्रीकर आदींची प्रमुख उपस्थिती होती. 

भुमरे म्हणाले, ‘मोसंबी फळबागांचे जास्तीत जास्त उत्पादन घेण्यासाठी शेतकऱ्यांना शेती तंत्रज्ञानाची आवश्‍यकता आहे. संत्र्याच्या तुलनेत लागवडीतील तफावतीमुळे मिळणारे अनुदानही कमी आणि उत्पादनही कमी मिळत आहे. त्यामुळे मोसंबी, संत्रा लागवडीचे अंतर सारखेच ठेवण्याविषयी प्रयत्न सुरू आहेत. कृषितज्ज्ञांचे मार्गदर्शन घेऊन हे काम केले जाईल. फळबाग वाढीसाठी शासनाकडून फलोत्पादनमंत्री या नात्याने मोठी मदत मोसंबी उत्पादकांना मिळवून दिली जाईल. त्यात औरंगाबाद व जालना जिल्ह्यांतील गोदाकाठच्या मोसंबी उत्पादकांवर विशेष लक्ष असेल.’’

कापसाची शेती अशी फायद्याची

कापूसतज्ज्ञ डॉ. बैनाडे म्हणाले, ‘‘कापसाची शेती फायद्याची करण्यासाठी वेळेत पऱ्हाटी नष्ट करणे, विभागानुसार कापसाचे हब व त्यानुसारच वाणांची निश्‍चिती व तेच उपलब्ध होण्याची सोय, लागवडीपासून काढणीपर्यंतचे भाडेतत्त्वावर तंत्रज्ञान, सुक्ष्म सिंचनाशिवाय कापसाची लागवड न करणे, कापसाची रूईच्या स्वरूपात विक्री व खर्चाच्या तुलनेत हमीभाव मिळणे आवश्‍यक आहे. डॉ. कापसे यांनी फळबागांची इतर देश व इतर भागातील स्थितीची मराठवाड्याशी  तुलनात्मक स्थिती व त्याचे परिणाम व उपायाविषयी सादरीकरणातून माहिती दिली.