बुलडाणा : देशात विविध घोटाळे, फायली गायब झाल्या असताना सध्या ‘मी चौकीदार’ असा ट्रेंड सुरू आहे. सक्षम चौकीदार असताना दहशतवादी हल्ले कसे झाले, असा प्रश्न उपस्थिती करून स्वाभिमानी शेतकरी संघटनेने या ‘चौकीदारांना’ प्रतीकात्मक शिट्ट्या पाठविल्या आहेत. 

संघटनेचे जिल्हाध्यक्ष कैलास फाटे यांच्या नेतृत्वात बुधवारी (ता.२७) खामगाव येथे टपालाद्वारे शिट्ट्या पाठविण्यात आल्या. निषेधात्मक असलेल्या या प्रकाराबाबत फाटे म्हणाले, की अनेक दिग्गज ‘मी चौकीदार’ असल्याचे म्हणत आहेत. त्यांनी देशाचे किती संरक्षण केले, ते जाहीर करावे. राफेलची फाइल चोरी गेली. कोट्यवधी घेऊन मल्ल्या, नीरव मोदी गायब झाले. देशावर ३०० किलो आरडीएक्स घेऊन दहशदवादी हल्ला झाला. हे रोखण्यास चौकीदार सक्षम नाहीत का, असा प्रश्‍न आहे.

आता तरी देशाचे संरक्षण योग्य करा अशा संदेश देऊन भाजपच्या दिल्ली कार्यालयात शिट्या पाठविण्यात आल्या. जे कुणी देशाचे चौकीदार आहेत, त्यांनी निदान या शिट्या घेऊन काटेकोरपणे देशाचे संरक्षण करावे. शिट्या घेऊनही तुम्ही कर्तव्य बजावत नसाल, तर पुढच्या काळात चौकीदाराचा गणवेश देखील पाठवू , असा इशारा जिल्हाध्यक्ष फाटे यांनी यावेळी दिला.