मानोरा, जि. वाशीम ः सोयजना येथील शेतकरी ज्ञानेश्वर मिसाळ यांच्या आत्महत्येला जबाबदार असणाऱ्या मंत्र्यांवर गुन्हे दाखल करण्यात यावेत, अशी मागणी स्वाभिमानी शेतकरी संघटनेचे राज्याचे नेते तथा वस्त्रोद्योग महामंडळाचे माजी अध्यक्ष रविकांत तुपकर यांनी येथे आयोजित पत्रकार परिषदेत केली.

वेळीच दखल घेतली गेली असती, तर या शेतकऱ्याचा बळी गेला नसता. ही आत्महत्या नसून सरकारने केलेली हत्याच आहे, असा आरोप करतानाच मृत शेतकऱ्याच्या कुटुंबीयांचे संपूर्ण कर्ज माफ करावे, असेही श्री. तुपकर या वेळी म्हणाले.

कृषी राज्यमंत्री सदाभाऊ खोत व समाजकल्याणमंत्री राजकुमार बडोले यांची भेट घेतल्यानंतरही मंत्र्यांनी कुठलीच दखल घेतली नाही. यामुळे सोयजना येथील कर्जबाजारी शेतकरी ज्ञानेश्वर नारायण मिसाळ (वय ५६) यांनी यवतमाळ येथील एका लॉजमध्ये ६ डिसेंबर रोजी अात्महत्या केली. शोकाकुल मिसाळ कुटुंबीयांचे तुपकर यांनी सांत्वन केले.

यानंतर पत्रकारांशी बोलताना ते म्हणाले, की सरकारचे चुकीचे धोरण शेतकऱ्यांच्या आत्महत्येस कारणीभूत ठरत आहे. शेतकरी मिसाळ यांनी चिठ्ठी लिहून ठेवली. त्यात सदाभाऊ खोत व राजकुमार बडोले यांची भेट घेतली. मात्र त्यांनी प्रतिसाद दिला नसल्याचा उल्लेख शेतकऱ्याने केला आहे.

मेट्रोची गरज नाही. डिजिटल इंडियाही नको, आधी शेतकऱ्यांचे प्रश्न सोडवा म्हणजे ते आत्महत्या करणार नाहीत, अशी व्यवस्था निर्माण करण्याची गरज असल्याचे शेतकऱ्याने म्हटले होते. खऱ्या अर्थाने हे मंत्रीच शेतकऱ्याच्या आत्महत्येला जबाबदार असल्याने त्यांच्याविरुद्ध गुन्हे दाखल करावेत, अशी मागणीही श्री. तुपकर यांनी केली.

कृषिपंपांची वीज जोडू नका, त्यांच्याकडून सक्तीची वसुली करू नका; अन्यथा त्याचे परिणाम भोगावे लागतील, असा सज्जड इशाराही श्री. तुपकर यांनी या वेळी दिला. या पत्रकार परिषदेला वाशीमचे जिल्हाध्यक्ष दामोदर इंगोले, नेते विठ्ठल घाडगे, श्याम पवार, शिवसेना तालुकाप्रमुख रवी पाटील अादी उपस्थित होते.