जळगाव ः  खानदेशात सोमवारी (ता. १९) सायंकाळी व रात्री अनेक भागात समाधानकारक पाऊस झाला. अनेक दिवसानंतर चांगला पाऊस झाल्याने बळीराजासह दुबार पेरणीच्या पिकांनाही जीवदान मिळाले. 

खानदेशात सुमारे १० ते १३ हजार हेक्टरवरील पिके पावसाअभावी होरपळल्याने मोडावी लागली होती. जळगाव जिल्ह्यात जळगाव, यावल, चोपडा, धुळ्यातील शिंदखेडा,  नंदुरबारमधील शहादा, नवापूर, नंदुरबार भागात पावसाची शेतकरी प्रतीक्षा करीत होते. या भागात दुबार पेरणी अनेकांनी १२ जुलैनंतर केली होती. पण त्यावर समाधानकारक पाऊस नव्हता. सोमवारी सायंकाळी पाऊस आला. त्यामुळे या पेरणीसह इतर पिकांना लाभ होणार असल्याचे शेतकऱ्यांचे म्हणणे आहे. 

सोमवारी जळगाव जिल्ह्यातील धरणगाव, अमळनेर, पारोळा, एरंडोल, जळगाव, चोपडा, यावल, भुसावळ, जामनेर, मुक्ताईनगर, रावेर आदी भागात बऱ्यापैकी पाऊस झाला. अनेक महसूल मंडळांमध्ये ४५ मिलीमीटरपेक्षा अधिक पाऊस सोमवारी झाला. या पावसाने जुलैमधील पावसाची टक्केवारीदेखील वाढणार आहे. 

२४ तासांतील पाऊस (मि.मी) ः जळगाव ः जळगाव २७, चोपडा २९, यावल ३१, भुसावळ १९. धुळे ः शिंदखेडा २४, साक्री ३२. नंदुरबार ः अक्कलकुवा ३८, शहादा २४.

  नदी, नाल्यांना पाणी

धुळ्यातही शिंदखेडा, धुळे, साक्री, शिरपुरात पाऊस झाला. सातपुड्यातील पाड्यांवर भागातील नदी, नाल्यांना प्रवाही पाणी आले. शिरपुरातील अनेर धरणातील साठाही वाढण्यास सुरवात झाली. नंदुरबारमधील शहादा, तळोदा, नवापूर, अक्कलकुवा, नंदुरबार तालुक्यांतही मध्यम ते जोरदार पाऊस झाला. जोरदार पाऊस काही वेळ झाला. नंतर मध्यम स्वरूपाचा पाऊस झाला. रात्रीदेखील हलका पाऊस काही भागात सुरूच होता. या पावसामुळे खानदेशातील केळी, ऊस, कापूस, भाजीपाला आदी पिकांचे सिंचन करण्याची समस्यादेखील दूर झाली आहे.