कोल्हापूर  : यंदाच्या हंगामात उसाचा पहिला हप्ता एकरकमी ३५०० रुपये व गेल्या हंगामातील अंतिम दर ४५०० रुपये घेतल्याशिवाय हंगाम सुरू करू देणार नाही, असा इशारा शेतकरी संघटनेचे अध्यक्ष रघुनाथदादा पाटील यांनी दिला.

संघटनेच्या वतीने कोल्हापूर येथे बुधवारी (ता. १०) आयोजित ऊस परिषदेत श्री. पाटील बोलत होते. या वेळी कालिदास अापेट, शिवाजी नांदखिले, बाळासाहेब पठारे, वंदना माळी, पी. जी. पाटील वाकरेकर, ॲड. माणिक शिंदे आदींसह शेतकरी उपस्थित होते.

या वेळी श्री. पाटील म्हणाले, की राज्यकर्त्यांसह इतर शेतकरी संघटना व कारखानदारांनी मिळून शेतकऱ्यांना लुटण्याचे काम सुरू केले आहे. येथून पुढील काळात हे खपवून घेतले जाणार नाही. मागणीनुसार दर न मिळाल्यास आम्ही तीव्र आंदोलन उभारू. आंदोलनाची नवी दिशा लवकर जाहीर करणार असल्याचे श्री. पाटील यांनी सांगितले.  

गेल्या काही वर्षांपासून ठिकठिकाणी विविध शेतकरी संघटना नव्याने स्थापन होत आहेत. राजकीय कार्यकर्त्यांच्या पुरस्कृत या संघटना आहेत. राजकीय पक्षाच्या मदतीवर संघटना उभ्या राहात आहेत. पण या सर्व सरकारप्रणित आहेत. सरकारने एफआरपीची रक्कम साडेनऊ वरून दहा केली. याचबरोबर एफआरपीचे तुकडे करून देण्याच्या हालचालीही सुरू केल्या आहेत. एकरकमी एफआरपी हा कायदा पायदळी तुडवून त्याचे तुकडे करीत शेतकऱ्यांना लुटण्याचे काम सुरू आहे.

गुजरातसारखीच परिस्थिती महाराष्ट्रात आहे. पण दर देताना मात्र गुजरातपेक्षा कितीतरी कमी दर ऊसाला मिळतो. त्यामुळे गुजरात इतका दर कारखान्यांनी द्यावा, याची मागणी आमची आहे. काही कारखान्यांना ठेवीवर व्याज द्यावे लागते. म्हणून ठेवी शेअर्समध्ये वर्ग केल्या आहे. ही शेतकऱ्यांची फसवणूक आहे. या विरोधातही आम्ही भविष्यात लढणार आहोत. आताची लढाई आरपारची आहे, असे श्री. पाटील यांनी सांगितले.

संघटनेच्या वतीने करण्यात आलेल्या मागण्या