करकंब जि. सोलापूर : बनारस येथील हिंदू विद्यापीठात कृषी पदवीचे शिक्षण घेणाऱ्या विध्यार्थ्यांनी सोलापूर येथील राष्ट्रीय डाळिंब संशोधन केंद्राच्या माध्यमातून करकंब येथील महेश व्यवहारे यांच्या डाळिंब शेतीला नुकतीच भेट देऊन माहिती जाणून घेतली. उच्च प्रतीचे डाळिंब प्रथमच पाहून हरखून गेलेल्या ह्या विद्यार्थ्यांनी बनारसमध्ये डाळिंबाची बाग लावून चांगले उत्पादन घेण्याचा मानस व्यक्त केला.

चार गट करून हे विद्यार्थी देशाच्या वेगवेगळ्या भागांत तेथील प्रसिद्ध असणाऱ्या पिकांचे व्यवस्थापन व मार्केंटिंगचा अभ्यास करण्यासाठी गेले आहेत. सोलापूर जिल्ह्यातील डाळिंब शेतीचा अभ्यास करण्यासाठी विद्यार्थ्यांचा एक गट चार दिवसांच्या अभ्यासदौऱ्यासाठी येथील डाळिंब संशोधन केंद्रात दाखल झाली होता.

या विद्यार्थ्यांनी डाळिंब संशोधन केंद्राचे तांत्रिक अधिकारी युवराज शिंदे व संशोधन सहयोगी धनंजय मुंढेवाडीकर यांच्या मार्गदर्शनाखाली १५ एकर डाळिंबाचे क्षेत्र असणाऱ्या करकंब येथील महेश व्यवहारे यांच्या शेतीला भेट दिली.  व्यवहारे यांनी विद्यार्थ्यांना छाटणी, विरळणी, खत आदीसंबंधी मार्गदर्शन केले.