पुणे ः पुणे विभागात सरासरी २३ हजार ३०० हेक्टर क्षेत्रापैकी १६ हजार ६०० हेक्टरवर म्हणजेच ७१ टक्के क्षेत्रावर उन्हाळी पिकांची पेरणी झाली आहे. मका, भुईमूग, बाजरी ही पिके वाढीच्या अवस्थेत आहेत. सध्या रब्बी हंगामातील ज्वारी, हरभरा या पिकांची काढणी पूर्ण झाली आहे. उशिराने पेरलेल्या गहू पिकाची काढणी सुरू आहे, अशी माहिती कृषी विभागाच्या सूत्रांनी दिली.
पुणे विभागात उन्हाळी मक्याचे सरासरी ४४४० हेक्टर क्षेत्र आहे. त्यापैकी आतापर्यंत चार हजार ४० हेक्टरवर पेरणी झाली आहे. उन्हाळी बाजरीची ४१७० हेक्टरवर पेरणी झाली आहे. भुईमुगाचे सरासरी क्षेत्र १७ हजार ८०० हेक्टर असून, त्यापैकी आतापर्यंत ८३७० हेक्टरवर पेरणी झाली आहे. उन्हाळी मुगाची वीस हेक्टरवर पेरणी झाली आहे.
नगर जिल्ह्यात नेवासा, श्रीगोंदा तालुक्यात उन्हाळी पिकांची मोठ्या प्रमाणात पेरणी झाली आहे. राहुरी, संगमनेर, अकोले, कोपरगाव, श्रीरामपूर, राहाता, अकोले, जामखेड तालुक्यांत मका, भुईमूग या पिकांची बऱ्यापैकी पेरणी झाली आहे. शेवगाव, पाथर्डी तालुक्यांत उन्हाळीची पेरणी झालेली नाही.
पुणे जिल्ह्यातील जुन्नर, खेड, आंबेगाव, बारामती तालुक्यांत उन्हाळी पिकांची पेरणी चांगल्या प्रमाणात झाली आहे. पुरंदर, शिरूर, दौंड, हवेली, भोर, इंदापूर तालुक्यांत पेरणीचे प्रमाण अत्यल्प आहे. मावळ, वेल्हे, मुळशी तालुक्यांत उन्हाळी पिकांची पेरणी झालेली नाही.
सोलापूर जिल्ह्यातील करमाळा, पंढरपूर, माळशिरस, मंगळवेढा तालुक्यांत बऱ्यापैकी क्षेत्रावर उन्हाळी पिकांची पेरणी झाली आहे. उत्तर सोलापूर, दक्षिण सोलापूर, बार्शी, अक्कलकोट, मोहोळ, माढा, सांगोला तालुक्यांत पेरणीचे प्रमाण अत्यल्प आहे.
जिल्हानिहाय झालेली उन्हाळी पेरणी ः (हेक्टरमध्ये) जिल्हा | सरासरी क्षेत्र | झालेली पेरणी | टक्के |
नगर | ८४०० | ५३२० | ६३ |
पुणे | ६४६० | ८२५० | १२७ |
सोलापूर | ८४४० | ३०३० | ३५ |