नगर  ः महात्मा फुले कृषी विद्यापीठाच्या कडधान्य सुधार प्रकल्पाने संशोधित केलेल्या ‘फुले विक्रम’ या वाणाच्या लागवडीला महाराष्ट्र, मध्य प्रदेश आणि गुजरात या राज्यांत (देशातील मध्य विभागात)ही मान्यता देण्यात आली आहे. बिरसा कृषी विद्यापीठ, रांची (झारखंड) येथे झालेल्या हरभरा संशोधन आढावा बैठकीत ही मान्यता मिळाली आहे. बिरसा कृषी विद्यापीठ, रांची (झारखंड) येथे २७ ते २९ ऑगस्ट अशी तीन दिवस या कालावधीत राष्ट्रीय पातळीवरील वार्षिक हरभरा संशोधन आढावा बैठक झाली. या बैठकीसाठी देशातील विविध राज्यांतून हरभरा संशोधक उपस्थित होते. या बैठकीत महात्मा फुले कृषी विद्यापीठाच्या कडधान्य सुधार प्रकल्पाने विकसित केलेल्या देशी हरभऱ्याच्या ‘फुले विक्रम’ या वाणावर चर्चा झाली. कंबाइन हार्वेस्टरने काढणी करता येणारा वाण असल्याने शेतकऱ्यांसाठी फायद्याचा असल्याचे स्पष्ट करण्यात आले. त्यानंतर देशाच्या मध्य विभागासाठी (महाराष्ट्र, मध्य प्रदेश आणि गुजरात) ‘फुले विक्रम’ हा वाण प्रसारित करण्यात आला आहे. हा वाण विकसित करण्यासाठी महात्मा फुले कृषी विद्यापीठाचे कुलगुरू डॉ. के. पी. विश्वनाथा तसेच संशोधन संचालक तथा विस्तार शिक्षण संचालक डॉ. शरद गडाख यांच्या मार्गदर्शनाखाली हे संशोधन सुरू होते. दहा वर्षांच्या संशोधनानंतर संशोधित केलेला हा देशातील तिसरा व राज्यातील पहिलाच वाण आहे, असे कडधान्य सुधार प्रकल्पाचे प्रमुख डॉ. नंदकुमार कुटे यांनी सांगितले.  ‘फुले विक्रम’ वाणाची वैशिष्ट्ये