यवतमाळ  : पावसाच्या सरी बरसताच जिल्ह्यातील तब्बल दोन लाख १६ हजार हेक्‍टरवर खरीप पेरणी झाली. यंदा १२ ते २२ जूनदरम्यान पाऊस होणार नसल्याची शक्‍यता हवामान विभागाने वर्तविली आहे. त्यामुळे आता कोरडवाहू शेतजमिनीवरील लागवड व पेरणी केलेले पिकं धोक्‍यात येण्याची शक्‍यता वर्तविण्यात येत असून, शेतकऱ्यांच्या चिंतेत भर पडली आहे.

रोहिणी व मृगनक्षत्रात जिल्ह्यात बऱ्यापैकी पाऊस झाला. जून महिन्याच्या सुरवातीलाच पावसाचे आगमन झाल्याने शेतकरी समाधानी होते. पावसाचा अंदाज घेत अनेक शेतकऱ्यांनी पेरणीला सुरवात केली. मागील आठ दिवसांत जिल्ह्यात तब्बल दोन लाख १६ हजार हेक्‍टरवर पेरणी झाली. मात्र, आता पावसाचा खंड पडला आहे. आणखी पाच ते सात दिवस पाऊस येण्याची शक्‍यता नसल्याचा अंदाज हवामान विभागाने वर्तविला आहे. अशा स्थितीत पेरणी केलेले शेतकरी अडचणीत येण्याची दाट शक्‍यताही वर्तविण्यात येत आहे.

६५ मिमी पाऊस झाल्याशिवाय पेरणी करू नये, असे आवाहन कृषी विभागाने केले असले तरी शेतकऱ्यांपर्यंत याबाबत मार्गदर्शन पोहोचलेच नाही. त्यामुळे अगदी कमी कालावधीत मोठ्या प्रमाणात पेरणी झाली आहे. सध्या जमिनीत काही प्रमाणात ओलावा आहे. एक-दोन दिवसांत पावसाची सर आल्यास पिकांना धोका नाही. मात्र, पाच ते सहा दिवस विलंब झाल्यास मोठी अडचण निर्माण होण्याचा अंदाज शेतकऱ्यांचा आहे.

ज्या शेतकऱ्यांजवळ ओलिताची सुविधा आहे, अशांना सध्यातरी चिंता नाही. परंतु, कोरडवाहू शेतकऱ्यांसमोर मोठा प्रश्‍न निर्माण झाला आहे. बियाणे खरेदी करताना कृषी केंद्रचालक किंवा कृषी विभागाने शेतकऱ्यांना मार्गदर्शन करणे गरजेचे होते. परंतु, बहुतांश ठिकाणी शेतकऱ्यांना माहिती देण्यात आली नसल्याने शेतकरी पुन्हा संकटात सापडण्याची दाट शक्‍यता व्यक्त केली जात आहे.

यंदा साधारणतः चार लाख ७० हजार हेक्‍टरवर कापूस लागवड होण्याचा अंदाज आहे. यापैकी आतापर्यंत जिल्ह्यात एक लाख ७१ हजार २८० हेक्‍टरवर कापसाची लागवड करण्यात आलेली आहे. पेरणीची स्थिती (हेक्‍टर) ः गळीत धान्य ः २०,२७१, कडधान्य ः २१, ८२५, तृणधान्य ः ६६, नगदी पीकं ः एक लाख ७३ हजार.