हिंगोलीः जिल्ह्यात बुधवार (ता. २०) पर्यंत ९४ हजार २६२ हेक्टरवर म्हणजेच २७.७० टक्के क्षेत्रावर खरिपाची पेरणी झाली असल्याची माहिती जिल्हा अधीक्षक कृषी अधिकारी व्ही. डी. लोखंडे यांनी दिली.

जिल्ह्यात यंदा ३ लाख ४० हजार ३१० हेक्टरवर खरीप पिकांची पेरणी होईल, अशी शक्यता आहे. जूनच्या पहिल्या पंधरवाड्यात झालेल्या पावसानंतर सर्वच तालुक्यांतील शेतकऱ्यांनी पेरणी केली. खासकरून कापूस, हळद लागवड तसेच सोयाबीन, तूर, मूग, उडिदाच्या पेरणीवर भर दिला. हिंगोली, कळमनुरी, सेनगांव तालुक्यात पेरण्याची गती अधिक होती. वसमत, औंढा नागनाथ तालुक्यातील अनेक मंडळांमध्ये पावसाने हुलकावणी दिल्यामुळे पेरणी होऊ शकली नाही. गेल्या दोन दिवसांत झालेल्या पावसामुळे लांबणीवर पडेलल्या पेरण्यांना सुरवात झाली आहे.

बुधवार (ता. २०) पर्यंत जिल्ह्यांमध्ये ९४ हजार २६२ हेक्टरवर पेरणी झाली आहे. यामध्ये हिंगोली तालुक्यातील १६ हजार ३९ हेक्टर (२१.०९ टक्के), कळमनुरी तालुक्यातील ४२ हजार ३५२ हेक्टर (६१.५० टक्के), वसमत तालुक्यातील ५ हजार ७१० हेक्टर (६.९० टक्के), औंढा नागनाथ तालुक्यातील ५ हजार ३८४ हेक्टर (८.७ टक्के), सेनगांव तालुक्यातील २४ हजार ७७६ हेक्टर (४८.७० टक्के) क्षेत्राचा समावेश आहे. पीकनिहाय पेरणी क्षेत्राचा विचार केला असता सोयाबीन ६२ हजार ९३३ हेक्टर (४७.६३ टक्के), कापूस ११ हजार ६७३ हेक्टर (१३.८५ टक्के), तूर ११ हजार ३२८ हेक्टर (४०.४४ टक्के), मूग १ हजार ९०४ हेक्टर (१०.५४ टक्के), उडिद १ हजार ७९९ हेक्टर (१०.९६ टक्के), ज्वारी १ हजार ४०१ हेक्टर (३.१२ टक्के), मका २३१ हेक्टर (३५ टक्के), हळद २ हजार ९९३ हेक्टर या पिकांचा समावेश आहे.